Бош вазир ўринбосари Ўктам Барноев йилқичилик ва от спорти федерациясига раис бўлди

Ўзбекистон Республикаси бош вазири ўринбосари Ўктам Барноев Ўзбекистон йилқичилик ва от спорти федерацияси раислигига сайланди.

6 июль куни ташкилотда навбатдан ташқари ҳисобот-сайлов конференцияси бўлиб ўтди. Онлайн мажлисда Ўктам Барноев номзоди тавсия қилинди ва конференция иштирокчилари томонидан бир овоздан маъқулланди.

Шунингдек, конференцияда федерация раҳбарияти ҳамда 13 кишидан иборат ижроқўм аъзолари таркиби ҳам тасдиқланди. Унга кўра, раис ўринбосарлари сифатида Феруз Абдуллаев, Баҳром Норқобилов, Аваз Исмоилов ва Камол Худойбердиев номзодлари маъқулланди. Шу билан бирга Камол Худойбердиев федерация бош котиби лавозимига ҳам тасдиқланди. Бунгача федерацияда раис ўринбосари сифатида фаолият олиб борган Баҳром Газиев ҳамда Акмал Тошевлар ҳам ўз лавозимида қолди.

Ўктам Барноев (1964 йилда туғилган) 1997—2000 йилларда Бухоро вилояти Қишлоқ ва сув хўжалиги бошқармаси бошлиғининг иқтисодиёт ва ислоҳотлар масалалари бўйича ўринбосари сифатида ишлаган. 2000—2002 йилларда Қишлоқ ва сув хўжалиги вазирлиги тизимида раҳбар лавозимларда фаолият олиб борган.

2002—2004 йилларда Вазирлар Маҳкамасининг агросаноат мажмуасида етакчи мутахассис, 2004—2005 йилларда ҳукуматнинг Қишлоқ ва сув хўжалиги масалалари бўйича ахборот-таҳлил департаменти мудири, 2005—2007 йилларда Қишлоқ ва сув хўжалиги, қишлоқ хўжалиги маҳсулотларини қайта ишлаш ва халқ истеъмоли маҳсулотлари ахборот-таҳлил департаменти мудири лавозимларида ишлаган.

Шунингдек, 2007—2008 йилларда қишлоқ ва сув хўжалиги вазири биринчи ўринбосари, 2008—2010 йилларда Самарқанд вилояти ҳокими, 2011—2016 йилларда Қишлоқ ва сув хўжалиги вазирлигининг Республика сув инспекцияси бошлиғи, 2016 йилда «Ўзагрокимё» компанияси бошқаруви раиси лавозимларида фаолият олиб борган. У 2016—2020 йилларда Бухоро вилоятига ҳокими лавозимида ишлаган. 2020 йилнинг февраль ойида Барноев бош вазирнинг аграр ва озиқ-овқат соҳаларини ривожлантириш масалалари бўйича ўринбосари лавозимига тайинлаганди.