Равшан Ҳайдаров: «Сурхон» бошқарувидаги дебют ўйиним омадли чиқмаганидан афсусдаман

Футбол бўйича Coca-Cola Суперлига 8-туридан ўрин олган «Локомотив» — «Сурхон» учрашувидан (2:1) сўнг икки жамоа бош мураббийлари иштирокида матбуот анжумани ўтказилди.

Дастлаб «Сурхон» бошқарувида дебют ўйининини ўтказган Равшан Ҳайдаров ўз фикрлари билан ўртоқлашди.

«Ўйин қизиқарли, тенгма-тенг курашларга бой бўлди. Иккала жамоа ҳам футбол ўйнашга ҳаракат қилди. «Локомотив» сафида маҳоратли футболчиларни кўплиги ва яратилган вазиятлардан унумли фойдаланиш қобилияти кучлилиги ғалабада муҳим рол ўйнади. Ўйинни назорат қилиш бўйича бизни жамоа ҳам ёмон ҳаракат қилмади.

Биздаги камчиликлардан бири вазиятлардан фойдалана олмаслик бўлди. Афсуски, «Сурхон» жамоасидаги илк ўйиним омадли чиқмади. Лекин, хатолардан тўғри хулоса чиқарамиз, таҳлил қиламиз. Кўриб турибман жамоада потенциал бор. Ўйлайманки, барчаси ўз йўлига тушиб кетади. Ҳали очколар жамғарамиз.

«Сурхон» жамоаси раҳбариятидан таклиф тушганидан кейин улар билан гаплашдим. Мен ҳали U-23 терма жамоасига масъулман, раҳбарият бундан хабардор эди. Бўлажак олимпия терма жамоасини шакллантириш ва бошқалар бўйича режаларимиз пандемия сабаб ўзгариб кетди. Шунинг учун таклиф тушгач бир ҳафатача ўйладим. Мураббийлик амалиётида бўлиш учун таклифга розилик бердим. Жамоани бир нечта ўйинларини кузатдим. Таркибда тажрибали футболчилар бор. Бундай тажрибали футболчилар билан ўзгача ўйин услубини ишлаб чиқиш мумкин. Ёш футболчилар билан бошқа ўйин услубини жорий қилишимиз мумкин. Иш жараёнида қайси позицияларни кучайтириш ҳақида кўриб чиқамиз», — дейди Ҳайдаров.

Матбуот анжуманининг иккинчи қисмида мезбонлар устози Андрей Фёдоров қатнашди.

«Рестартдаги илк ғалабадан кейин руҳий тайёргарликка кўпроқ эътибор бердик. Биз барча ўйинларни оғир деб ҳисоблаймиз. Ҳозирда мураббийлар штаби билан нафақат келгуси турдаги рақиб, балки, чемпионатнинг барча ўйинларини кузатиб боришга ҳаракат қиляпмиз. Бирор жамоа осон ўйин ўтказмаяпти. Ўтган турда «Қизилқум» мағлуб этилганидан кейин айрим мухлислар «Локо» ўзига келиб олди, энди барча рақиблар янчиб ташланса керак деб ўйлади. Йўқ.

Ўтган ғалабадан кейин кичик давр мобайнида футболчиларни «Сурхон»га қарши ўйин янада оғирроқ бўлишини тушунтира олганимиз ва бунга эришганимизга хурсандман. Шунингдек, футболчилар ҳам бизнинг барча гапларимизни, йўриқларимизни тўғри тушунмоқда. Бирор жамоа очколарни шундоқ бериб қўймаяпти, очколарни тортиб олиш керак. Бунинг учун эса жуда кучли характер ва касбга фидойилик бўлиши керак. Йигитларга раҳмат, биз ҳақли ғалабага эришдик», — дейди Фёдоров.

Мазкур ғалабадан сўнг «Локомотив»нинг очколари 12 тага етди ва жамоа 8-ўринда қолди. «Сурхон» (4) эса 12-поғонада бормоқда.