Давлат хавфсизлик хизмати ходимларининг Ички ишлар вазирлиги билан биргаликда Тошкент шаҳри ва Тошкент вилояти ҳудудларида ўтказган тезкор тадбирлари натижасида жами аъзолари 25 нафар бўлган иккита яширин «Жиҳодчилар» гуруҳи фаолиятига чек қўйилди. Бу ҳақда ДХХ матбуот хизмати «Дарё»га маълум қилди.

Маълумотларга кўра, гуруҳлардан бири 2019 йилнинг май ойида ташкил этилган бўлиб, унга етакчилик қилган шахс ўтган йилнинг ноябрь ойида Сурия давлатидаги «Тавҳид ва жиҳод катибаси» халқаро террористик ташкилоти сафига бориб қўшилган.

Иккинчи гуруҳ эса муқаддам экстремизм ва терроризм билан боғлиқ жиноятларни содир этганлиги учун жазо муддатини ўтаб чиққан фуқаро томонидан тузилган.

Дастлабки суриштирув жараёнларида маълум бўлишича, биринчи гуруҳ аъзоларининг аксарияти ҳозирда Суриядаги жангарилар сафида бўлган ўз етакчиси билан интернет орқали мунтазам равишда алоқа қилиб турган.

Ўзаро йиғинларда гуруҳлар аъзолари диний экстремистик ва террористик ташкилотлар ғоявий раҳнамоларининг, жумладан, Абу Салоҳ, Абдуллоҳ Зуфар, Содиқ Самарқандийнинг ҳижрат ва жиҳод қилиш тўғрисидаги аудио, видеомаърузалари ҳамда даъватларини тинглаб, «Жиҳодчилар» оқими ғояларини ўз атрофидагиларга тарғиб қилиб келишган.

1968—2002 йиллар оралиғида туғилган мазкур шахсларнинг 3 нафари аввал экстремизм ва терроризм билан боғлиқ жиноятлар содир этганлиги учун жавобгарликка тортилган бўлса-да, қилмишларидан тўғри хулоса чиқармаган.

Таъкидланишича, мазкур гуруҳлар аъзолари орасида хусусий нашриёт раҳбари, тиббиёт ходими, араб тили курси ўқитувчиси, умумий овқатланиш муассасалари ишчилари ва тижорат ишлари билан шуғулланувчи шахслар бор.

Ҳар икки гуруҳ аъзоларининг яшаш манзилларида ўтказилган тинтув тадбирлари давомида 200 дан ортиқ норасмий диний адабиёт ва варақалар, шунингдек, компьютер, ноутбук, планшет, мобил телефон, флеш-карта ва DVD дисклар борлиги аниқланиб, уларда сақланаётган маълумотларни экспертизадан ўтказиш учун процессуал тарзда расмийлаштирилиб олинган.

Ҳозирда Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.

Шу ўринда эслатиб ўтиш лозимки, Ўзбекистон Олий Судининг қарори ҳамда Вазирлар Маҳкамаси ҳузуридаги Дин ишлари бўйича қўмитанинг хулосаларига кўра Абу Салоҳ, Абдуллоҳ Зуфар, Содиқ Самарқандийнинг маърузалари ақидапарстлик ғоялари билан йўғрилганлиги ва мамлакатдаги конституцион тузумни қонунга хилоф тарзда ўзгартиришга қаратилганлиги боис уларни республика ҳудудига олиб кириш, сақлаш ва тарқатиш тақиқланади ҳамда Жиноят кодексининг тегишли моддалари билан жиноий жавобгарликка сабаб бўлади.

Эслатиб ўтамиз, 2019 йилнинг 23 октябрь куни Тошкент шаҳрида мазкур оқимнинг бир гуруҳ аъзолари қўлга олинган эди. Жорий йилнинг 7 январь куни Тошкентда мазкур оқимнинг яна бир гуруҳи қўлга олинган. 8 июнь куни Бойсунда оқимнинг яна бир гуруҳи фаолиятига чек қўйилди. 12 июнда Андижонда «Жиҳодчилар»нинг яна бир гуруҳини қўлга олгани маълум бўлганди.

Маълумот учун, Ўзбекистон Олий судининг 2016 йил 26 сентябрдаги қарори билан «Жиҳодчилар» диний-экстремистик оқими Ўзбекистон ҳудудида тақиқланган ташкилотлар рўйхатига киритилган.