БМТ Хавфсизлик кенгаши пандемия фонида бутун дунёда ўт очишни тўхтатиш ҳақида резолюция қабул қилди

Бирлашган Миллатлар Ташкилотининг Хавфсизлик кенгаши ташкилот бош котиби Антониу Гутерришнинг коронавирус пандемияси фонида дунёдаги барча низоларда ўт очишни тўхтатиш ҳақидаги чақирувини қўллаб-қувватлади. Тегишли резолюция 1 июль куни қабул қилинди. Бу ҳақда БМТнинг янгиликлар маркази хабар берди.

Резолюцияда айтилишича, зўравонлик пандемияни кучайтириши мумкин, бу эса ўз навбатида урушларнинг оқибатларини оғирлаштиради. Хавфсизлик кенгаши барча низолар иштирокчиларига мурожаат қилди ҳамда ҳарбий ҳаракатларни тўхтатишни ва инсонпарварлик ёрдамини хавфсиз етказиб бериш учун «камида кетма-кет 90 кун барқарор инсонпарварлик танаффусини» таъминлашни сўраган.

Бунда ўт очишни тўхтатиш ИШИД, «Ал-Қоида», «Жибҳат ан-Нусра» ва бошқа террорчилик ташкилотларига қарши амалга ошириладиган ҳарбий операцияларга тааллуқли бўлмайди. Маълум қилинишича, резолюция бир овоздан қабул қилинган.

Антониу Гутерриш 23 март куни бутун дунёда ўчишни тўхтатишга чақирган. Бироқ Хавфсизлик кенгаши резолюцияни шакллантириш масаласида келиша олмаган. Вазият ҳужжатнинг янги талқини билан ҳал қилинди. Унда Жаҳон соғлиқни сақлаш ташкилоти ҳам эслаб ўтилган.

Аввалроқ Саудия бошлиқ коалиция Яманга авиазарбалар бергани ҳақида хабар қилинганди. Миср президенти эса мамлакат ҳарбийларини Ливияга бостириб киришга тайёр туришга чақирганди.