Тошкент шаҳридаги Вирусология илмий-текшириш институти клиникасида яна 2 нафар, Эпидемиология, микробиология ва юқумли касалликлар илмий-текшириш институти клиникасида 24 нафар, Тошкент тиббиёт академиясининг кўп тармоқли клиникасида 41 нафар, шаҳар 1-сон клиник шифохонасида яна 18 нафар, 3-сон туғруқ комплексида 5 нафар, жами 90 нафар коронавирус инфекциясига чалинган бемор соғайиб, 3 июль куни ўз уйига кузатилди. Бу ҳақда Соғлиқни сақлаш вазирлиги хабар берди.

Аввалроқ Тошкент ва Наманганда 127 нафар бемор соғайгани ҳақида хабар берилганди. Шу тариқа, Ўзбекистонда 3 июль куни 217 киши коронавирус инфекциясидан фориғ бўлди ва соғайиш кўрсаткичи бўйича янги кунлик рекорд ўрнатилди.

Эслатиб ўтамиз, бундан олдинги рекорд кўрсаткич 27 июнь куни қайд этилган бўлиб, 202 нафар бемор тузалган ва уйига кузатилганди.

Вазирликнинг қайд этишича, 3 июль куни Тошкент шаҳридаги тиббиёт муассасаларида 212 нафар бемор коронавирус инфекциясидан тузалиб, айни пайтгача Тошкент шаҳри ва вилоятида COVID-19’дан соғайганлар сони 3837 нафарга етди.

Ҳозирда мамлакат бўйлаб соғайганлар сони 6251 нафарни ташкил этмоқда. Ўзбекистонда 3 июль соат 17:00 ҳолатига кўра, коронавирус инфекцияси қайд этилганлар сони 127 кишига кўпайиб, 9326 нафарни ташкил этмоқда. Шу пайтга қадар 28 нафар бемор касаллик асоратлари оқибатида ҳаётдан кўз юмган.