«Реал» дарвозабони Тибо Куртуа Испания учинчи дивизиони вакили «Интер Мадрид»ни сотиб олди.
Marca нашрининг хабар қилишича, «Бетис» ҳужумчиси Борха Иглесиас ҳам «Интер» акционерига айланган. Бир неча ҳафта аввал Куртуа ва Иглесиас DUX Gaming номли киберспорт ташкилотининг эгаларига айланганди. Таъкидланишича, Куртуа футбол ва киберспорт клубида консултантлик қилади.
Эслатиб ўтамиз, коронавирус пандемияси давридаги танаффус вақтида бельгиялик футболчи бир нечта киберспорт мусобақаларида иштирок этган. Хусусан, Куртуа F1 2019 симуляторида Formula-1 пойгачилари билан куч синашганди.
Шунингдек, Тибо март ойи охирида NBA 2K20 симулятори бўйича турли спортчи ва юлдузлар иштирокида ўтказилган #NBATogether лойиҳасида қатнашди.
Куртуа 2018 йилда «Челси»дан «Реал» сафига ўтганди. Унинг мадридликлар билан амалдаги шартномаси 2024 йилга қадар мўлжалланган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)