Тошкент шаҳри Юнусобод туманида яшовчи 42 ёшли эркак коронавирус инфекцияси асоратлари оқибатида вафот этди. Бу ҳақда Соғлиқни сақлаш вазирлиги хабар қилди.
Хабарда қайд этилишича, Юнусобод туманида яшовчи 42 ёшли Д.Х. 2020 йил 20 июнь куни бош мия қон айланиши ўткир бузилиши (инсульт)нинг қайталаниши билан (2018 йилда биринчи маротаба инсульт бўлган) ўта оғир ҳолатда Республика шошилинч тиббий ёрдам илмий маркази реанимация бўлимига ётқизилган.
Беморда 22 июнь куни коронавирус аниқланган. Д.Х.га ихтисослашган тиббий ёрдам кўрсатиш мақсадида у Тошкент тиббиёт академиясининг кўп тармоқли клиникасига ўтказилган. Беморнинг аҳволи кескин ёмонлашгани сабабли сунъий нафас олдириш аппаратига олинган.
Беморнинг даволаниши давомида кунлик аҳволи тажрибали шифокорлар томонидан ҳам назоратга олиниб, бир неча бор консилиумлар ўтказилган. Бироқ шу соҳа мутахассисларининг стандартлар асосида ўтказган реанимацион муолажаларига қарамасдан бемор бош мия қон айланишининг ўткир бузилиши, ўткир нафас ва ўпка-юрак етишмовчилигидан вафот этган.
Аввал Тошкентдаги Яккасарой туман тиббиёт бирлашмаси шифокорининг коронавирусга чалингани, оқибатда миокард инфаркти, ўткир нафас ва юрак қон-томир етишмовчилигидан вафот этгани хабар қилинганди.
Эндиликда ўлим ҳолатлари сони 22 тага етди. Июнь ойининг ўзида 7 нафар бемор ҳаётдан кўз юмган.
Ўзбекистонда 28 июнь соат 23:30 ҳолатига кўра, коронавирус инфекцияси қайд этилганлар сони 135 нафарга кўпайиб, 7948 нафарни ташкил қилмоқда. 28 июнда жами 266 та янги касалланиш ҳолати (247 таси карантин муассасаларида, 16 таси аҳоли орасида) кузатилди.
28 июнь кун давомида Тошкентда 67 нафар, Қашқадарёда 14 нафар бемор коронавирусдан тузалиб, мамлакатда инфекциядан фориғ бўлганлар сони 5329 нафарга етган.
Изоҳ (0)