26 июнь Ўзбекистонда коронавирус инфекцияси тасдиқланган 250 нафар бемордан 25 нафари аҳоли орасида аниқланган бўлса, 27 июнь куни 255 нафар бемордан 54 нафари аҳоли орасида тасдиқланиб, шундан 39 нафари Тошкент шаҳрида аниқланди, деб ёзмоқда Соғлиқни сақлаш вазирлиги Жамоатчилик билан алоқалар бўлими.
Қайд этилишича, икки кун ичида умумий касалланиш кўрсаткичи бироз ошган, аҳоли орасида коронавирусга чалиниш ҳолати эса кескин ўсган.
Жумладан, «Ўзбектелеком» касаба уюшмаси ходими Ж.Х.да, шифохонага ётиш мақсадида намуна топширган Юнусобод туманида яшовчи Н.Й.да касаллик аниқланган.
Юнусободда яшовчи 2 нафар фуқарода (Юнусобод деҳқон бозоридан бир неча бор харид қилган), Олмазор туманида яшовчи Б.И.да (тана ҳарорати кўтарилиб, намуна топширган), Шайхонтоҳур туманида яшовчи Б.А.да (профилактика мақсадида намуна топширган), Учтепа туманида яшовчи Н.А.да коронавирус қайд этилган.
«Ўрикзор» савдо мажмуасининг озиқ-овқат дўкони сотувчиси Ф.Х.да, Шайхонтоҳур туманидаги сут маҳсулотлари ишлаб чиқариш цехи ишчиси Ф.Р.да, Юнусобод туман ФХДЁ бўлими масъул ходими С.С.да ҳам коронавирус инфекцияси борлиги маълум бўлган.
Шунингдек, 1-сон Республика клиник шифохонасида даволанаётган бемор О.А.да, «Ипотека» банк Шайхонтоҳур филиали кассири М.Х.да, «Асака банк» бош офиси ходими А.Д.да, Сергели туманидаги Enter engineering қурилиш компанияси ходими Т.К.да ҳам касаллик аниқланган.
ССВ хабарида вазият тобора жиддийлашаётганини ҳисобга олиб, аҳоли орасида коронавирусга чалиниш хавфи юқорилиги боис Тошкент шаҳри аҳолиси ва меҳмонларидан карантин қоидаларига қатъий амал қилиш сўралган.
Мавзуга доир:
Изоҳ (0)