UFC он ESPN 12 мусобақасининг асосий жангида иштирок этган Дастин Порье ва Ден Ҳукернинг қанча гонорар олгани маълум бўлди. Бу ҳақда Спортекз хабар бермоқда.
Таъкидланишича, енгил вазн тоифасида собиқ вақтинчалик чемпион Дастин Порье кўпроқ ҳақ олган. Жанг олдидан унга 250 минг доллар ваъда қилинганди. Шунингдек, Дастинга 100 минг доллар ғалаба қозонгани учун ва яна 50 минг доллар бонус тариқасида тақдим этилди. Кечанинг энг яхши жангида қатнашгани учун эса ҳомийлар томонидан яна 20 минг доллар қўшиб берилди.
Шу тариқа Лас-Вегасдаги мусобақада Порье жами 420 минг доллар ишлаб олди.
Унинг рақиби Ден Ҳукернинг даромади эса деярли уч баравар кам. Ҳукернинг кафолатланган тўлов суммаси 80 минг долларга тенг бўлган. Кечанинг энг яхши жангида иштирок этгани учун 50 минг доллар, ҳомийлар томонидан яна 15 минг доллар олди. Янги зеландиялик жангчи ҳаммаси бўлиб ушбу жангдан 145 минг доллар даромад орттирди.
Эслатиб ўтамиз, Тошкент вақти билан 28 июнь тонгида бўлиб ўтган жангда Порье ҳакамлар қарорига кўра (48-47, 48-47, 48-46) Ҳукердан устун келди.
Изоҳ (0)