Сардоба вилояти ҳокимлиги ижтимоий тармоқларда «Сардоба фалокати ортидан уйсиз қолганлар қуруқ ваъдалардан тоқати тоқ бўлганини айтмоқда» сарлавҳаси остида тарқалган хабар юзасидан ўрганиш ишларини олиб борди.
Маълум бўлишича, кенг муҳокамаларга сабаб бўлган ушбу хабар Сардоба тумани «Дўстлик» маҳалласидаги сув тошқинидан талафот кўрган 28 та хонадон эгалари томонидан йўлланган.
Республика махсус ишчи гуруҳи хулосаси билан «Дўстлик» маҳалласидаги 61 та бетон панелли уйлар қайта таъмирланмоқда, таъмирлаш ишларига Қорақалпоғистон Республикаси масъул этиб бириктирилган. 21 май кунидаги «Қишлоқ қурилиш лойиҳа» МЧЖнинг Сирдарё вилояти Сардоба тумани «Дўстлик» МФЙдаги уй-жойларнинг ҳолати тўғрисида тақдим этган техник хулосасига кўра, ушбу маҳалладаги 90 та турар жойдан 28 таси ўтган асрнинг 70 йилларида қад ростлаган бўлиб, массивнинг ер ости сувлари сатҳининг ер юзасига яқин бўлган паст жойда қурилган.
Сув тошқинидан кейин ушбу 28 та турар жойларнинг юк кўтариш конструкциялари сув остида қолиб, сувни шимиб олиши натижасида иккита уй қулаб тушган. Қолган турар жойларнинг конструкцияларида ёриқлар ва ўйилишлар, арматура симларининг очилиши, занглаш ва синиш ҳолатлари пайдо бўлган. Йиғма девор темир бетон панелларининг айрим қисмлари бузилган, чўккан, деформация аломатлари бор, плита деворлари вертикалдан оғишганлиги аниқланган.
Мазкур хонадон эгаларига томорқалари ўзларида қолдирилиши билан бирга, 400 метр узоқликда барча қулайликларга эга замонавий лойиҳалар асосида қурилаётган 1480 та хонадонга мўлжалланган, 37 та кўп қаватли уй-жойлардан 3 хонали хонадонлар 2020 йилнинг 1 сентябрь кунига қадар тугалланиб, ажратилади. Таъкидланишича, ҳозирда мазкур 37 та кўп қаватли уйларнинг қурилиши ишлари жадал суръатларда кетмоқда.
Шу муносабат билан 24 июнь куни мурожаат йўллаган фуқаролар ҳамда вилоят, туман ва масъул мутасаддилари иштирокидаги «Дўстлик» МФЙ ҳудудида жойлашган қурилиш штабида брифинг бўлиб ўтган. Брифинг давомида ушбу хонадон эгаларининг талаблари эшитилган. Мутахассислар томонидан 28 та турар жой биноларининг бугунги кундаги техник ҳолати бўйича, мутлақо таъмирлаб бўлмаслиги, бутунлай яроқсиз аҳволга келиб қолганлиги, сейсмик жиҳатдан хавфли эканлиги аниқ мисоллар билан тушунтириб ўтилган.
Таҳлилларга кўра, мазкур уй-жойларнинг қайта таъмири учун ўртача ҳисобда 2 миллиард 175 миллион сўмни (1 та уй учун 70-80 миллион сўм тўғри келади) ташкил этадиган бўлса, хонадон эгаларига берилиши назарда тутилаётган 1 та уйнинг нархи ўрта ҳисобда 450 миллион сўмни, 28 та хонадонники эса 12,6 миллиард сўмни ташкил этади.
Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Фавқулодда вазият сабабли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда. Сардоба тумани «Дўстлик» маҳалласида 37 та 1480 хонадонли; Мирзаобод тумани «Ҳақиқат» маҳалласида 20 та 800 хонадонли ва «Навбаҳор» маҳалласида 9 та 360 хонадонли кўп қаватли турар жой қурилиш ишлари бошланган.
Изоҳ (0)