АҚШ Давлат котиби Майкл Помпео Ўзбекистонда одам савдосига қарши амалга оширилган чораларни ижобий баҳолади. Бу ҳақда Давлат департаментининг раҳбари 2020 йил учун Одам савдоси тўғрисидаги ҳисоботига бағишланган анжуманда таъкидлаб ўтди, деб ёзмоқда «Gazeta.uz».
«Марказий Осиёда баъзи ҳукуматлар узоқ вақтдан бери одамларни пахта саноатида ва бошқа соҳаларда ўз аҳолисини мажбурий меҳнатга жалб қиларди. Ўзбекистоннинг бу борадаги муҳим саъй-ҳаракатлари минтақадаги бошқа давлатлар учун янги стандартни яратмоқда», — деди Майкл Помпео.
Шу билан бирга, Давлат котиби АҚШ ҳукуматлар ҳомийлигида амалга ошириладиган одам савдосига йўл қўймаслигини ва бу сингари ҳукуматларни қўллаб-қувватламаслигини билдирди.
«Биз ҳукумат ҳомийлигида амалга ошириладиган одам савдосига жиддий қараймиз. АҚШ ўз фуқароларини зулмга дучор қилиш сингари одам савдоси сиёсати ёки моделини илгари сурадиган ҳар қандай ҳукумат билан бирга бўлмайди», — дея қайд этиб ўтди Помпео.
Маълумот учун, Олий Мажлис Сенати раиси бошчилигида 17 июнь куни Одам савдосига ва мажбурий меҳнатга қарши курашиш миллий комиссияси мажлиси бўлиб ўтди. Унда Танзила Норбоева одам савдосига ва мажбурий меҳнатга қарши курашиш борасида 2019 йилда одам савдоси билан боғлиқ жиноятлар 22 фоизга камайгани ҳақида таъкидлаб ўтган. Шу билан бирга, 2019 йилда одам савдоси билан боғлиқ жиноятлар 2018 йилга нисбатан камайган бўлса-да, бу йўналишда содир этилган умумий жиноятлар орасида чақалоқ савдоси билан боғлиқ жиноятлар юқорилигича (43 фоиз) қолаётганини маълум қилган.
Мавзуга доир:Танзила Норбоева чақалоқлар савдосида воситачиларнинг учдан бири тиббиёт ходимлари эканлигини айтди
Аввалроқ Қорақалпоғистонда 13 ёшли фарзандини 15 минг долларга пуллаётган аёл қўлга олингани, Хоразмда 2 ёшли фарзандини 7700 долларга сотмоқчи бўлган аёл қўлга тушгани ҳамда Навоийда 3 ойлик боласини 3 хонали уйга алмаштираётган аёл ва унинг отаси жиноят устида ушлангани ҳақида хабарлар берилган эди.
Изоҳ (0)