Шавкат Мирзиёев Москвадаги «Номаълум аскар» ёдгорлигига гул қўйди (фото)

Ўзбекистон Президенти Шавкат Мирзиёев Иккинчи жаҳон урушида эришилган ғалабанинг 75 йиллигига бағишлаб ўтказилган парад муносабати билан Россияга амалий ташрифи давомида Москва шаҳрининг Александр боғидаги «Номаълум аскар» ёдгорлигига гул қўйди. Бу ҳақда Президент матбуот хизмати хабар берди.

Қайд этилишича, Иккинчи жаҳон урушига Ўзбекистондан 1,951 миллионга яқин киши сафарбар этилиб, 200 мингдан зиёд аскар ва офицерлар жанговар давлат мукофотлари билан тақдирланган. Уруш ўчоғига айланган ўлкалардан Ўзбекистонга 1,5 миллион киши, жумладан, 250 мингдан зиёд бола эвакуация қилинган.

«Президент Шавкат Мирзиёев инсоният тинчлиги учун жон фидо қилган ватанпарвар инсонларнинг хотирасига ҳурмат бажо келтирди», — дейилади хабарда.

Таъкидланишича, 1966—1967 йилларда барпо этилган мазкур мажмуада абадий олов алангаланиб туради. Унга Россиянинг маданий мероси объекти мақоми берилган.

Эслатиб ўтамиз, Ўзбекистон Президенти Шавкат Мирзиёев Ғалаба парадида қатнашиш учун 23 июнь куни Москвага етиб борди. Шу куни Шавкат Мирзиёев Россия президенти Владимир Путин билан учрашди. Россия президенти Ғалаба парадига келгани учун Шавкат Мирзиёевга миннатдорлик билдирди. Ўзбекистон Президент ва ҳарбийлари 24 июнь куни парадда иштирок этди.

Аввалроқ мазкур парадда иштирок этиш учун Москвага борган Қирғизистон делегацияси аъзолари орасида коронавирус аниқлангани ҳақида хабар берилганди, Шу сабабли, Қирғизистон президенти Сўронбой Жээнбеков парадда иштирок этмади.

Маълумот учун, Владимир Путин Москвада ўтган Ғалаба парадига барча МДҲ давлатлари раҳбарларини таклиф қилган. Озарбайжон президенти Илҳом Алиев, Арманистон бош вазири Никол Пашинян мамлакатларидаги эпидемиологик вазият туфайли, Туркманистон президент Гурбангули Бердимуҳамедов 29 июнда 63 ёш — Пайғамбар ёшига тўлиши сабаб тантанали тадбирларга бора олмаслигини эълон қилган. Қозоғистоннинг биринчи президенти Нурсултон Назарбоев эса коронавирус юқтириб олган ва у ҳам Москвага бормаган.