Футбол бўйича Ўзбекистон чемпионати 5-тури доирасида ўтган «Андижон» — «Металлург » учрашувидан (0:2) сўнг ҳар икки жамоа бош мураббийлари иштирокида матбуот анжумани бўлиб ўтди.
Дастлаб меҳмонлар бош мураббийи Андрей Шипилов ўйин ҳақидаги фикрлари билан ўртоқлашди.
«Ўтган турдаги ғалабадан кейин иштиёқимиз юқори эди. Бугунги рақиб билан ўтган турда бир кунда ўйнагандик, шу сабабли, икки клубда ҳам дам олиш куни бир хил эди. Майдон ҳақида ҳеч нарса демайман, фақат чимлари ўсган эди. Шу нарса қийинчилик туғдирди. Иккинчи бўлимда ҳаво ҳарорати бироз пасайгани учун ўйнаш осон бўлди. Умуман олганда, бугунги ўйиндан қониқдим. «Локомотив» билан ўйиндан кейин ютқазишимизга ҳаққимиз йўқ эди», — дейди Шипилов.
Матбуот анжуманининг иккинчи қисмида «бургутлар» устози Диёрбек Мирзабоев қатнашди.
«Ҳозир ҳар қандай фикрим баҳонага ўхшаши мумкин. Барча айбни дарвозабонга ағдармаган бўлардим. Хабарингиз бор, жамоамизга янги мураббий келган. Янги мураббий ўз фалсафасини йигитларга етказиши учун вақт талаб қилиняпти.
Ҳар бир учрашувда ғалаба учун майдонга чиқишни ният қиламиз, лекин ниятнинг ўзи камлик қилади. Ишлашимиз керак, фақат меҳнат талаб қилинади. Вақти келиб Виктор Кумиковнинг имзоси билинади. Ҳозир унинг фалсафаси остида ишлаяпмиз», — деди Мирзабоев.
Мазкур ғалабадан кейин «Металлург» очколарини 10 тага етказиб, 4-ўринга чиқиб олган бўлса, «Андижон» 2 очко билан 12-ўринда бормоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)