Рўзиқул Бердиев: «Машъал»га қарши баҳсда ҳужумчиларим ўйинидан қониқмадим

Ўзбекистон Суперлигаси 5-туридан ўрин олган «Машъал» ва «Насаф» жамоалари ўртасидаги ўйиндан (0:0) сўнг ҳар икки жамоа бош мураббийлари иштирокида матбуот анжумани ўтказилди.

Дастлаб, муборакликлар катта мураббийи Дилявер Ваниев ўйин ҳақидаги фикрларини билдириб ўтди.

«Шахсан мен учун «Насаф» жуда принципиал рақиб ҳисобланади. «Насаф»га қарши иккинчи рақам остида ҳаракат қилдик. Қаршиликлар қанот орқали яхши ўйнашди. Йигитларга раҳмат айтаман, бугун улар ажойиб ҳаракат қилишди. «Сурхон» билан ўйинда дарвозабон сўнгги дақиқаларда бироз бееътиборлик қилди. Бугун эса жамоани жуда кўп вазиятларда қутқарди. Мамлакатимиз футболидаги энг кучли дарвозабонлар «Машъал» тарбияланувчилари ҳисобланади. Ҳозирги дарвозабонимиз ҳам аста-секин ривожланиб, ўсиб боради. «Машъал» ўзбек футболидаги энг катта академиялардан бири.

Яширишга ҳожат йўқ, «Насаф» ўйинда устунлик қилди. Биз 1 очкони қўлга киритишга эришдик», — дейди Ваниев.

Сўнгра Қарши клуби устози Рўзиқул Бердиев ўз фикрлари билан ўртоқлашди.

«Ўйин оғир кечди. Биз чуқур ҳимояланадиган жамоаларга қарши ўйнашда муаммоларга учрамоқдамиз. Иккинчи ўйиндирки, шу ҳолат такрорланяпти. Бунинг учун бизнинг ҳужум чизиғидаги вакилларимиз яхши ўйнаши керак. Аммо улар бугун майдонда умуман кўринмади. Бугун 4 та ҳужумчи билан ўйнадик, аммо  ҳеч бири дарвозага зарба бера олмади. Бундай ўйин билан ғалаба қозониш қийин.

Бундан ташқари «Машъал» жамоаси бугун 5 кишилик ҳимоя қўрғонини яхши ташкил этди. Тезкор қарши ҳужумлар ҳам уюштиришди. Ўйин шундай якунланиши керак эди. Чунки биз вазият ярата олмадик, муборакликлар кўпроқ ҳимояланди», — деди Бердиев.