Ўзбекистонда одам савдоси билан боғлиқ жиноятларнинг 43 фоизи чақалоқлар савдосига тўғри келади. Бу ҳақда 17 июнь куни Сенат раиси, Одам савдосига ва мажбурий меҳнатга қарши курашиш миллий комиссияси раиси Танзила Норбоева маълум қилди, деб хабар бермоқда «Gazeta.uz».
Унинг сўзларига кўра, 2019 йилда одам савдоси билан боғлиқ жиноятлар 2018 йилга нисбатан 22 фоизга камайган, аммо чақалоқлар савдоси 38 фоиздан 43 фоизга ошган.
Сирдарё ва Хоразм вилоятларида 5 тадан, Тошкент, Қашқадарё, Сурхондарё вилоятларида ва Тошкент шаҳрида 4 тадан, Самарқанд, Фарғона, Наманган, Андижон, Навоий вилоятларида 3 тадан чақалоқ савдосига оид жиноят содир этилган.
2019 йилда бундай жиноятлар 72 киши томонидан амалга оширилган бўлса, уларнинг 62 нафари (86 фоизи) аёллардир.
«Чақалоқни сотиш сабаблари ўрганилганда, 19 та ҳолатда оилавий шароитнинг оғирлиги, болани боқишга имкон йўқлиги, 3 та ҳолатда уй-жой олиш, 9 та ҳолатда ўз айбини яшириш ва 10 та ҳолатда моддий манфаат учун бунга қўл урилгани маълум бўлмоқда», — деди у.
Шунингдек, чақалоқлар савдосида воситачиларнинг 32 фоизи тиббиёт ходимлари эканлигини таъкидлади.
«Одам савдосида фақатгина аёллар ёки бир киши айбдор эмас. Унга шароит яратиб бераётган, шу нарсага ундаётган муҳит ҳам борлиги маълум. Бундай ҳолат ўзбек жамияти учун мутлақо хос эмас. Шунинг учун бу масалага бошқача ёндашишимиз керак», — деди Сенат раҳбари.
Сенатор Ўзбекистонда аввал ҳам одам савдоси ҳолатлари бўлгани, бироқ мавзу ёпиқлиги боис бу ҳақда маълум қилинмаганини таъкидлаб ўтди.
Мавзуга доир:
- Навоийда 23 кунлик чақалоғини 3 млн сўмга сотмоқчи бўлган аёлга жиноий иш очилди
- Навоийда 3 ойлик боласини 3 хонали уйга алмаштираётган аёл ва унинг отаси қўлга олинди
- Хоразмда 2 ёшли фарзандини 7 700 долларга сотмоқчи бўлган аёл қўлга олинди
- Қорақалпоғистонда 13 ёшли фарзандини 15 минг долларга пуллаётган аёл қўлга олинди
- Сирдарёда чақалоғини 10 минг долларга сотмоқчи бўлган аёл қўлга олинди
Изоҳ (0)