Ўзбекистон Соғлиқни сақлаш вазири Алишер Шодмонов ва Жанубий Корея Соғлиқни сақлаш ва ижтимоий таъминот вазири Пак Нинг Ху ўртасида телефон орқали мулоқот бўлиб ўтди. Мулоқотда тиббиёт соҳасидаги ҳамкорликни янада кенгайтириш, шу жумладан, COVID-19’га қарши кураш борасида биргаликдаги саъй-ҳаракатларни кучайтириш масалаларига алоҳида эътибор қаратилган. Бу ҳақда вазирлик матбуот хизмати хабар берди.

Фото: DW

Маълумотларга кўра, икки давлат вазирлари Ўзбекистонда тегишли вазирлик ва идоралар билан биргаликда COVID-19’га қарши мобил иловаларини яратиб, трекинг усулини жорий этиш борасида келишувга эришган. Бу эса худди Жанубий Кореядагидек коронавирусга чалинган беморни ким билан мулоқот қилган ва қайси ҳудудларда бўлганлигини инновацион тарзда аниқ кўрсатиб бериш имкониятини яратади.

Бундан ташқари, ҳамкорликда коронавирус инфекциясига қарши курашда тест ва дориларни ишлаб чиқиш масалалари ҳам муҳокама этилган. Жумладан, COVID-19’га қарши вакцинани биргаликда клиник синовларини ўтказиш тўғрисида ҳам келишувга эришилган. Ўз навбатида Жанубий Корея Соғлиқни сақлаш ва ижтимоий таъминот вазири Пак Нинг Ху ушбу вакцинани дунё мамлакатларига тақдим этишда Ўзбекистон алоҳида устувор мавқега эга бўлишини таъкидлаб ўтган.

Музокаралар якунида соғлиқни сақлаш соҳасида Ўзбекистон—Жанубий Корея ҳамкорлиги марказининг имкониятларини янада кенгайтиришга ҳам келишиб олинди.

Аввалроқ Apple ва Google коронавирус тарқалишини кузатувчи мобил илова тўғрисидаги маълумотлар билан бўлишган эди.

Эслатиб ўтамиз, Корея Республикаси Соғлиқни сақлаш ва ижтимоий таъминот вазири Пак Нинг Ху ўтган йил апрель ойида мамлакатимизга ташрифи давомида Соғлиқни сақлаш вазирлигининг «Ўзбекистон Республикаси соғлиқни сақлаш аълочиси» кўкрак нишони ҳамда Тошкент тиббиёт академиясининг фахрий профессори унвони билан тақдирланган эди.

Ўзбекистонда 12 июнь соат 10:00 ҳолатига кўра, коронавирусга чалинганлар 4819 нафарга етди. Мамлакатда ҳозиргача 3637 нафар коронавирус инфекциясига чалинган фуқаро соғайган, 19 нафар бемор эса касаллик асоратлари оқибатида вафот этган.