АОКА штабида Санитария-эпидемиологик осойишталик агентлиги директорининг биринчи ўринбосари Ботир Қурбонов иштирокида брифинг бўлиб ўтди. Унда муҳим савол ва мурожаатлар юзасидан жавоб қайтарилди. Хусусан, Тошкент шаҳри коронавирус беморлари сони кўплигига қарамай, «сариқ» ҳудуд бўлиб қолаётганига изоҳ берилди.
Фото: «Дарё»
Ботир Қурбоновнинг таъкидлашича, Тошкент шаҳрида касаллик қайд этилган маҳалла, мавзе, даҳа ва йирик объектлар бўйича карантин чекловлари ўрнатилмоқда.
Унга кўра, жами 513 та маҳалла фуқаролар йиғинидан 42 таси — «қизил» ҳудуд, 132 таси — «сариқ» ҳудуд, 339 таси — «яшил» ҳудудга ажратилган.
«Тошкент шаҳри пойтахт эканлиги ҳисобга олиниб, аҳолининг ижтимоий-иқтисодий ислоҳотлари ва ҳаракатларига таъсир қилмай, тадбирларни манзилли белгилаш ишлари тизимли тарзда амалга оширилмоқда», — дейилади хабарда.
Эслатиб ўтамиз, Тошкентда 7 июнь куни 195 кишида коронавирус аниқланди. Шу вақтгача бир кунда бутун Ўзбекистон бўйича ҳам бунчалик кўп бемор аниқланмаган эди.
Республика махсус комиссиясининг 8 июнь куни ахборотида Тошкент шаҳрини «қизил», «сариқ» ва «яшил» тоифаларга ажратиш эпидемиологик вазиятдан келиб чиққан ҳолда Санитария-эпидемиологик осойишталик агентлигининг таклифи асосида маҳаллалар, даҳалар, мавзелар кесимида амалга оширилиши мумкинлиги айтилганди.
Май ойи ўрталарида Тошкентдаги «Улуғбек» маҳалласида коронавирусга чалинганлар сони ортгани сабабли карантин чоралари кучайтирилганди.
