8 июнь куни «Қалпоқ» ҳамда «Шўрданак» ҳажвий кўрсатувлари ижодкорлари ЙҲХБ ходимлари ҳақидаги ҳазиллари учун ички ишлар органлари ходимларидан кечирим сўрагани акс этган видеолар ички ишлар вазирлигининг Telegram каналига жойлаштирилди. Маданият вазирлиги ушбу ҳолатга муносабат билдирди.

Кадр: «Шўрданак» ҳажвий дастури

Қайд этилишича, вазирлик вакиллари вазият юзасидан «Шўрданак» ҳажвия гуруҳининг вакили билан суҳбатда бўлганида, фикр билдиришни истамаган.

«Шу билан бирга, маданият вазирлиги ҳажвия, сатира, аския борасида санъатни чегараламаслик фикрини билдирмоқда. Йиллар давомида ҳажвия орқали жамиятдаги муаммо ва иллатларни йўқ қилишга қаратилган, бу йўл орқали турли соҳа йўналишларини ислоҳ қилишга ҳам кўмаклашилган. Бу худди журналист ва блогерларнинг бир муаммони олиб чиқиб, уни ҳал этилишига қаратилган мавзуларга ўхшайди. Шундай экан, унда нима учун бу ҳазиллар ўринли қабул қилинмайди, деган саволлар ҳам йўқ эмас.

Агар ҳажвия бирон бир шахсга тегишли бўлиб, уни камситилишига қаратилган бўлса, маданият вазирлиги бундай ижодларни қўллаб-қувватламайди. Зеро, хоҳ ҳажвия, хоҳ драма, аския ҳамда сатира орқали жамиятдаги иллатларни даволашга қаратилган мавзулар ёки воқеалар намоён этилса, уни ҳеч нарса билан йўқ қилиб бўлмайди.

Тарихга бир назар солсак, ўзбек ҳажвий адабиёти сермазмун тарихга эгадир. Ҳажв, сатира-воқеликни акс эттиришнинг алоҳида ғоявий-бадиий принципи сифатида барча цивилизациялашган халқлар адабиёти, шу жумладан, ўзбек халқининг ҳам оғзаки ва ёзма ижодларида қадимдан катта ўрин олиб келган. Ижтимоий иллатларнинг кулгили танқиди бўлган сатира ўзбек халқ ижодида ҳам кенг тарқалган эди. Насриддин афанди, Алдар кўса каби тўқима образлар ҳажвий, миллий қаҳрамонлар ўз замонасининг иллатларини халқ орасида аскиялар ва ҳажвиялар билан намойиш этишган. Қадимдан халқнинг ичида ҳажвия, сатира, аския каби юмористик ижодлар кенг тарқалиб, оммалашган.

Хуллас, маданият ва санъат соҳасида чекловлар қўйилса, у ҳеч қачон ривожланмайди», — дейилади вазирлик муносабатида.