«Лукойл» компанияси коронавирус сабаб Хитойда газга бўлган талаб камайиб кетгани боис Ўзбекистонда газ қазиб олишни лойиҳа қувватидан 40 фоизга қисқартирди. Бу ҳақда компаниянинг биринчи чорак бўйича эълон қилган ҳисоботида келтирилган.
«Бу биринчи чоракда, шунингдек, апрель ва май ойларида углеводородлар қазиб олинишининг умумий ҳажмига таъсир кўрсатди», — дейилади компания фаолиятига оид таҳлил натижаларида.
«Лукойл» 2020 йилнинг биринчи чорагида Ўзбекистондаги объектлари орқали 2,839 миллиард куб метр газ қазиб олган, ўтган йилнинг шу даврида ушбу кўрсаткич 3,824 миллиард куб метрни ташкил этган. Шу орқали қисқариш 25,8 фоизни ташкил этмоқда, 2019 йилнинг тўртинчи чораги билан қиёслаганда эса (3,875 миллиард куб метр) қисқариш — 26,7 фоизга тенг.
Ўзбекистонда газ қазиб олишнинг қисқариши оқибатида юзага келган салбий таъсирлар чет эл билан маҳсулотлар алмашиш келишуви доирасидаги қазиб олиш лойиҳаларидаги улушни ошириш ҳисобига қисман қопланган.
Аввалроқ Ўзбекистон «Лукойл»дан 2018 йилда етказиб берилган газ учун 600 миллион долларга яқин қарз бўлиб қолгани ҳақида хабар берилган эди.
Изоҳ (0)