Ички ишлар органлари ходимлари ёш йигитларни ички ишлар бўлимига олиб кетиш учун қўлга олаётганлари акс этган видео ижтимоий тармоқларда тарқалиб кетди. Видеода акс этган воқеа бўйича Тошкент шаҳар ИИББ расмий маълумот берди.
Маълум бўлишича, 1 июнь куни тахминан соат 18:30 да Тошкент шаҳар ИИББ патруль-пост хизмати ходимлари «Мовий гумбазлар» хиёбони ҳудудини патруллаш давомида тўпланган фуқароларга ўйин карталари ёрдамида фокус кўрсатаётган икки нафар ёш йигитни кўриб қолган. Томошабинлар жамоат жойида бўла туриб ижтимоий масофани сақламаган. Яъни санитария-эпидемиология қоидалари бузилиб, инсон саломатлигига хавф туғдирилган. Шу сабабли ходимлар ёш йигитларга танбеҳ бериб, коронавирус инфекцияси тарқалишининг олдини олиш учун бу каби томошалар уюштирмасликни сўраган.
Аммо 2 июнь куни кечки пайт ППХ ходимлари яна ўша йигитлар жамоат жойида томоша кўрсатаётганини кўриб қолган. Уларда шахсни тасдиқловчи ҳужжатлар бўлмаган. Биринчи огоҳлантиришдан кейин тегишли хулоса қилмаган йигитлар жамоат жойида томоша уюштиришда давом этган. Шу сабабли ички ишлар органлари ходимлари улардан энг яқин бўлимга шахсларини аниқлаш учун ва профилактик суҳбат ўтказиш учун боришни сўраган.
Аммо йигитлардан бири ҳуқуқни муҳофаза қилувчи органлар ходимининг қонуний талабига бўйсунмаган. Бу ҳолат номаълум шахс томонидан мобил телефон камерасига видеога туширилиб, ижтимоий тармоқларда эълон қилинган.
«Йигитлар Яккасарой тумани ИИО ФМБ 3-сон ички ишлар бўлимига етказилди. Улардан бири вояга етмаган бўлгани учун дарҳол қўйиб юборилди. Иккинчиси эса жиззахлик 19 ёшли Олег Х. билан карантин қоидаларига риоя қилиш муҳимлиги борасида профилактик суҳбат ўтказилгач, қўйиб юборилди», — дейилади хабарда.
Изоҳ (0)