Сўх туманида учта дам олиш маскани яратилади. Тумандаги эски аэродромни қайта таъмирлаб, вилоят марказига ҳаво йўллари орқали бориб келишни йўлга қўйиш масаласи ҳам кўриб чиқилмоқда. Бу ҳақда Сўх тумани ҳокимлиги хабар берди.

Қайд этилишича, мазкур масалалар 3 июнь куни бош вазир Абдулла Арипов раҳбарлигида Сўх тумани ҳокимлигида бўлиб ўтган йиғилишда муҳокама қилинган.

Шунингдек, Симодон, Касминон, Ҳушёр, Малбуд ва Варган ҳудудларида икки ой давомида тик қудуқлар ўрнатилиб, бўш турган ерлар ўзлаштирилади. Олтита маҳалла фуқаролар йиғинида кичик саноат ҳудудлари ташкил этилиши белгилаб олинди.

Таъкидланишича, туманга ташриф буюрган вазирлар ўз соҳалари бўйича икки кун давомида мавжуд муаммоларни ўрганиб, уларни тўлиқ бартараф этиш учун манзилли дастур лойиҳаси ишлаб чиқилди.

Шунингдек, Сўх—Риштон йўли ва бошқа мавжуд муаммоларни бартараф этиш мақсадида таклифлар билдирилган.

Ҳудудда 2020 йил давомида қиймати 101 миллиард сўм бўлган 73 лойиҳа амалга оширилади. Бунинг натижасида 4,5 мингта янги иш ўрни яратилиши кутилмоқда. Банклар кўмагида 82 та лойиҳа амалга оширилиб, бу мақсадлар учун Сўх туманига 153 миллиард сўм кредит йўналтирилади.

Аввалроқ Сўх туманига янги ҳоким ва ички ишлар бўлимига янги раҳбар тайинлангани ҳақида хабар берилганди.

Маълумот учун, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳолиси ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққан. Қирғизистоннинг Боткен вилоятида уй ва омборхона ёниб кетган.

Ушбу ҳолат юзасидан 1 июнь куни Ўзбекистон бош вазири Абдулла Арипов Ўзбекистон—Қирғизистон чегарасида қўшни мамлакат ҳукумати раҳбари билан учрашди. Бундан ташқари, Президент Шавкат Мирзиёев Қирғизистон президенти Сўронбой Жээнбеков билан телефон орқали мулоқот қилди.