Қамчиқ довонида 4 июнь куни тонгда юз берган йўл-транспорт ҳодисаси оқибатида уч нафар ҳайдовчи вафот этди. Бу ҳақда Тергов департаменти хабар бермоқда.

Фото: Тергов департаменти

Ҳодиса соат 05:00 да Наманган вилояти Поп тумани «Қўшминор» МФЙ ҳудудидан ўтувчи А-373 Тошкент—Ош автомобиль йўлининг 227-километрида содир бўлган.

Фото: Тергов департаменти

63 ёшли А.Р. бошқарувида бўлган Sams русумли юк автомашинасининг тормоз тизими ишламай қолиши натижасида шу йўналиш бўйича йўлнинг четида тўхтаб турган 26 ёшли А.Ғ.нинг бошқарувида бўлган Isuzu юк машинаси ва 26 ёшли Н.Р.нинг бошқарувида бўлган иккинчи Isuzu юк автомашинасининг орқа қисмига урилиб, ағдарилган. Шундан сўнг Sams юк машинасининг кабина қисмида ёнғин юзага келган.

Фото: Тергов департаменти

Ҳодиса оқибатида Sams ҳайдовчиси А.Р. ва Isuzu ҳайдовчиси А.Ғ.лар ҳодиса жойида вафот этган, иккинчи Isuzu юк автомашинасининг ҳайдовчиси Н.Р. шифохонага олиб кетилаётган вақтида вафот этган.

Фото: Тергов департаменти

Тергов департаментининг «Дарё»га маълум қилишича, Isuzu’лардан бирида ҳам ёнғин юзага келган. Аммо ёнғиннинг юзага келиш сабаби ҳозирча номаълум.

Фото: Тергов департаменти

Фото: Тергов департаменти

Ижтимоий тармоқларда ЙТҲдан сўнг икки автомобиль ёнаётган вақтда олинган видео эълон қилинди.

Мазкур ҳолат юзасидан Поп тумани ИИБ ҳузуридаги Тергов бўлими томонидан Жиноят кодексининг 266-моддаси 3-қисми «а» банди (Одамлар ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Фото: Тергов департаменти

Фото: Тергов департаменти

Қамчиқ довонида юк машиналари иштирокида тез-тез ЙТҲлар содир бўлиб туради. 25 май куни Damas иккита юк машинаси орасида қолиб кетиши оқибатида 3 киши шифохонага ётқизилганди, 16 май куни Isuzu юк машинаси ағдарилиб кетиши оқибатида ҳам 3 киши шифохонага тушган, 30 апрель куни Volvo юк машинаси ёниб кетган, 24 апрель куни тормози ишламай қолган юк машинаси тоғга урилиши оқибатида ҳайдовчи вафот этганди.