Халқаро автомобиль федерацияси ва RM Sotheby’s кимошди уйи коронавирус инфекциясига қарши кураш доирасида хайрия савдоларини ўтказади. Унда Toyota’нинг «Formula-1» чемпионатидаги сўнгги болиди (пойга машинаси) сотувга қўйилади, деб хабар беради Motor.
Кимошди савдоларига қўйиладиган Toyota TF109-01 болиди ҳеч қачон пойгаларда иштирок этмаган. Автомобилдан 2009 йилги мавсумдан олдин синовларда фойдаланилган бўлиб, у япон маркасининг «Formula-1»даги сўнгги болидига айланган. Шундан сўнг, машина шиналарни синовдан ўтказиш учун Pirelli компаниясига бериб юборилган, шу сабабли болидга Италия брендининг логотиплари туширилган.
30 минг километр масофа босган автомобиль 700 от кучига эга 2,4 литрли V8 мотори билан жиҳозланган.
Бундан ташқари, онлайн-савдолар орқали олти карра «Formula-1» чемпиони Льюис Хэмилтон, 1996 йилги мавсум чемпиони Деймон Хилл, «24 соатли Ле-Ман» пойгаларининг икки карра ғолиби Том Кристенсен ва бошқаларга тегишли пойга комбинезонлари харид қилиш мумкин.
Хайрия савдолари 15—22 июнь кунлари бўлиб ўтади. Савдолар натижасида йиғилган маблағлар Қизил Хоч ва Қизил Ярим ой жамиятларига коронавирус пандемиясига қарши курашиш учун йўналтирилади.
Изоҳ (0)