Наманганда уйида таълим олаётган 600 нафар бола йўқланди
Наманганда 1 июнь – Халқаро болаларни ҳимоя қилиш куни муносабати билан вилоят прокуратураси ташаббуси билан уйида якка тартибда таълим олаётган 600 нафар ўқувчи йўқланди. Бу ҳақда «Дарё» мухбири Азизбек Абдувалиев хабар бермоқда.
Уларга чолғу асбоблари, спорт анжомлари, бадиий адабиётлар ва ўқув қуроллари топширилган.
Вилоят халқ таълими бошқармаси ахборот хизматига кўра, Наманганда жами 1065 нафар бола уйида якка тартибда таълим олмоқда. Улар жисмоний ҳаракати ва руҳий ривожланишида нуқсонлар кузатилган ўқувчилар ҳисобланади.
«Шунингдек, вилоят психофизик ривожланишида нуқсони бўлган болалар уйи тарбияланувчиларига кийим–кечак, гигиеник воситалар ҳамда ширинликлар топширилди. Ижтимоий-ҳуқуқий ёрдамга муҳтож вояга етмаганлар ва профилактик назоратга олинган ўқувчилар хонадонларига бориб, совға-саломлар берилди. Бундай йўқловлар яна давом этмоқда», – дейди вилоят прокурорининг катта ёрдамчиси Сардор Нишонов.
