Izboskanda 23-may kuni bir kishida koronavirus aniqlangan, 25-may kuni esa tumanda ommaviy tadbir o‘tkazildi (foto)

Andijon viloyatining Izboskan tumanida 25-may kuni “Andijon namunasi” asosida “Sog‘lom hayot uchun 5000 qadam” shiori ostida piyoda yurish tadbiri tashkil etilgan. Ommaviy tadbir aks etgan suratlar tuman hokimligi matbuot xizmati tomonidan e’lon qilindi.

“O‘zbekiston Respublikasi Prezidentining Andijon viloyatiga tashrifi chog‘ida Andijonlik faollar bilan o‘tkazgan yig‘ilishida aholi salomatligini saqlash, ularni sog‘lom turmush tarziga rioya qilishlari uchun ‘Andijon na’munasi’ asosida har kuni kechki yurishni tashkil etish bo‘yicha bergan topshiriq ijrosini ta’minlash, tuman aholisini salomatligini yanada yaxshilash maqsadida Izboskan tumanida ‘Sog‘lom hayot uchun 5000 qadam’ shiori ostida piyoda yurish tashkil etildi”, — deyiladi tuman hokimligi matbuot xizmati xabarida.

Ma’lum bo‘lishicha, 23-may kuni Izboskan tumanida yashovchi bir kishida koronavirus infeksiyasi aniqlangan.

Bemor bilan muloqotda bo‘lgan 51 kishi karantinga olingan. Ularning orasida oila a’zolari ham bor. Shu bilan birga, bemor bilan aloqada bo‘lgan 26 kishidan ham virusologik tahlil uchun surtma namunalari olingan.

Sog‘liqni saqlash vazirligi tomonidan 25-may kuni berilgan ma’lumotlarga ko‘ra, Andijon viloyatida koronavirusga chalinish bo‘yicha jami 175 ta holat qayd etilgan. Bu raqam 17-may kunidan buyon o‘zgarishsiz qolmoqda, viloyatda shu paytgacha 167 nafar bemor kasallikdan tuzalgan.