Samsung биринчи кўча телевизорининг суратлари билан бўлишди
Samsung компанияси уй девори ёки ҳовли шийпонига ўрнатиш учун мўлжалланган Terracе ТV линейкасини тақдим этди, деб хабар беради Hi-Tech.Mail.ru.
Мазкур телевизор корпуси махсус IP55 стандарти билан ҳимояланган — унга кучли ёғингарчилик ва чангли шамоллар ҳам қўрқинчли эмас. Телевизор қўшимча ҳимояси сабаб уй ичига мўлжалланган панеллардан анча қалин ва салмоқли кўринади.
Terracе ТV телевизорлари учта диагоналда тақдим этилади — 55, 65 ва 75 дюймли. Улар максимал ёруғлик — 2000 нтга тенг QLED матрица билан жиҳозланган. Бу эса экрандаги тасвир қуёшли кунда ҳам кўринишини таъминлайди. Қолган жиҳатлари билан у замонавий Smart TV телевизорларидан фарқ қилмайди, интернетни, 4К сифатни, HDR ва бошқа замонавий технологияларни қўллаб-қувватлайди.
Samsung телевизорга қўшимча равишда очиқ маконда ишлашга мўлжалланган ва IP55 стандарти билан ҳимояланган кўча саундбарлари линейкасини ҳам намойиш этди.
75 дюймли Samsung Terracе ТV нархи 6499 долларни ташкил этади. Унинг қимматлиги рекорд даражадаги ёруғ матрица ва сувдан ҳимоя корпусига эга эканлиги билан изоҳланган.
