Зироат ва Саида Мирзиёевалар Сардобадаги тошқиндан азият чеккан аҳоли билан учрашди

21 май куни Зироат Мирзиёева Сардоба сув омбори атрофидаги фавқулодда вазият рўй берган ҳудудларга ташриф буюрди ҳамда сув тошқини бўлган ерлардан эвакуация қилинган аҳоли билан учрашди. Бу ҳақда «Халқ сўзи Online» хабар қилган.

Зироат Мирзиёева одамларнинг аҳволи, саломатлиги, вақтинчалик яшаш жойларидаги шароит билан танишган, уларга самимий сўзлар билан далда берган.

«Ташқаридан тушкунликка тушманг, бу кунлар ўтиб кетади, дейиш осон. Лекин ҳозир ичингиздан нима ўтаётгани фақат сизга маълум! Ўғлим бошпанали бўлсин деб, ўзингиз емай, иморат кўтаргансиз. Қизимни тўйига деб, ўзингиз киймай, сарпо йиққансиз. Ҳаммасидан хабаримиз бор, кўрдик, эшитдик.

Энг муқаддас айёмлардан – Ҳайит арафасида сизни йўқлашни, ҳеч бўлмаса бир оғиз сўз билан далда бўлишни кўнглимга тугиб қўйгандим. Келинг, шундай табаррук кунларда дуога қўл очиб, эзгу ният қилайлик. Бу мусибатлар, машаққатлар тезроқ ортда қолсин. Ҳар бирингиз оила даврасида ҳаловат ва хотиржамликда яшанг, илоҳим. Аллоҳ хоҳласа, ҳаммаси яхши бўлади. Биз ёнингизда турамиз. Бутун Ўзбекистон халқи сиз билан! Президентимиз сиз билан!» — деган Зироат Мирзиёева.

Ташрифда «Замин» фонди ва Ўзбекистон касаба уюшмалари федерациясининг ҳамкорликдаги ижтимоий лойиҳаси эълон қилинди. Ушбу лойиҳа Сардоба, Оқолтин ва Мирзаобод туманларидаги 11 та зарар кўрган маҳаллаларда истиқомат қилган оилаларни қўллаб-қувватлаш мақсадида амалга оширилмоқда. Сув остида қолган ҳудудларни қайта тиклаш ва улкан қурилиш ишлари кетаётган бир пайтда аҳолининг бўш вақтини мазмунли ўтказишини таъминлаш мақсадида ёши 60 ёшдан ошган барча қариялар 10 кун давомида пойтахтда ва Тошкент, Сирдарё, Жиззах вилоятларида жойлашган сиҳатгоҳлар ва дам олиш масканларига, 7 дан 14 ёшгача бўлган болалар эса ёзги оромгоҳларга бепул таклиф этилади. Яқин кунларда таклифнома-сертификатлар ўз эгаларига етказилади.

Карантин талабларини инобатга олган ҳолда, акциянинг барча иштирокчилари олдиндан COVID-19 тест-текширувидан ўтказилади. Ҳамма хавфсизлик чоралари кўрилади, дейилган хабарда.

Саида Мирзиёева ҳам Сирдарё вилоятидаги ташриф таассуротлари ҳақида Telegram’даги каналида пост қолдирган.

Ойимлар билан Ҳайит байрами арафасида Сирдарё вилоятига одамларнинг ҳолидан хабар олгани бордик. Шунда ажойиб бир воқеа бўлди.

6-7 ёшлардаги болакай билан суҳбатлашяпмиз. ‘Нима бўлди ўзи, нима қилдинглар ўша пайт?’ − деб саволга тутдим. ‘Эрталаб вақтли уйғониб кетдик. Қарасак, ҳамма югуряпти, биз ҳам дадам билан кўчага югурдик’, – дейди. Шу пайт жажжи, ширингина сингилчаси гапга қўшилди, денг. Нигина экан исми. ‘Менинг оқ айиқчам бор-ку, ўша уйда қолган экан, - дейди кўзларини катта-катта очиб, — Мен уни чўкиб кетди деб ўйлаб, роса хафа бўлдим. Кейин дадам йўқ бўлиб қолдилар. Қидириб-қидириб, ўйинчоғимни топиб келдилар. Айиқчам қайтиб келди! Ҳозир ухлаб ётибди’.

Жуда таъсирланиб кетдим. Тасаввур қиляпсизми?! Одамларнинг кўзига ҳеч нима кўринмай, ҳар томонга ўзини урган бир пайтда Нигинанинг дадаси фарзандим ўксиб қолмасин деб, ортига қайтган.

Саида Мирзиёева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари.