20 май куни Ўзбекистон транспорт вазири Элёр Ғаниев, Қирғизистон транспорт ва йўл вазири Жанат Бейшенов, Хитой Халқ Республикасининг ислоҳотлар ва ривожланиш бўйича давлат қўмитасининг чет эл капитали ва хорижий инвестициялар департаменти бош директори ўринбосари Чжен Чипинг бошчилигида видеоконференцалоқа шаклида учрашув ўтказилди. Бу ҳақда Ўзбекистон транспорт вазирлиги ахборот хизмати хабар қилган.
Ўзбекистон томони ташаббуси билан ташкил этилган онлайн учрашувда Ўзбекистон—Қирғизистон—Хитой темир йўл қурилиши лойиҳасини амалга ошириш бўйича келгуси амалий чоралар муҳокама қилинди.
Хусусан, ушбу лойиҳа юзасидан томонлар тақдим этилган темир йўл қурилиши маршрутлари бўйича ягона тўхтамга келиш, лойиҳалаш ва қурилиш ишларида қўлланилаётган техник стандартлар, лойиҳани молиялаштириш манбалари ва бошқа ташкилий масалалар муҳокама қилинди.
Видеоанжуманда Элёр Ғаниев пандемия шароитида давлат чегаралари орқали темир йўл транспортида юкларни ташиш долзарб аҳамият касб этиб бораётганини таъкидлаган.
«Санитария-эпидемиология стандартлари шартларига мувофиқ деярли барча транспорт турларида юк ташувларига чекловлар қўйилмоқда. Карантин чоралари туфайли давлатларимиз ўртасида автомобилда юк ташувлари чекланган ҳолда амалга оширилмоқда. Мазкур жараёнлар фонида энг хавфсиз, ишончли транспорт воситаси эса темир йўл бўлиб қолмоқда. Айнан шу жиҳатнинг ўзи ҳам мазкур лойиҳани ҳаётга тезроқ татбиқ этиш зарурлиги кўрсатмоқда», – деган Элёр Ғаниев.
Учрашувда Хитой ва Қирғизистон томони мазкур темир йўл линияси ўтиши мумкин бўлган ҳудудлар бўйича берган таклифлари муҳокама қилинган. Томонлар тақдим этилган темир йўл қурилиши маршрутлари бўйича ягона тўхтамга келиш, ҳар бир йўналиш бўйича лойиҳанинг техник ва иқтисодий жиҳатларини яна бир карра кўриб чиқишга ва келаси ҳафтада худди шу форматда учрашув ўтказишга келишиб олган.
2019 йил ноябрь ойида Россия Хитой—Қирғизистон—Ўзбекистон темир йўли қурилиши учун 3 миллион доллар ажратгани хабар қилинганди.
Мавзуга доир: Ўзбекистон Россиядан бешта электровоз сотиб олади
Изоҳ (0)