Афғонистон президенти Муҳаммад Ашраф Ғани ҳамда собиқ бош вазир Абдулла Абдулла 17 май куни ҳукумат бошқарувини бўлиб олиш ҳақидаги келишувни имзолади. Бу ҳақда президент вакили Сиддиқ Сиддиқий хабар қилган.
Абдулла Абдулла ҳамда Ашраф Ғани
Фото: Reuters
«Ашраф Ғани ҳамда Абдулла Абдулла ўртасида сиёсий битим имзоланди. Абдулла Абдулла яраштириш бўйича Олий миллий кенгашга раҳбарлик қилади. Унинг вакиллари Кенгаш аъзолигига ва Вазирлар маҳкамаси таркибига киритилади», – деб ёзган Сиддиқ Сиддиқий Twitter’да.
Мавзуга доир: Афғонистон ҳукумати тинчлик келишуви доирасида «Толибон»нинг 1,5 минг нафар аъзосини озодликка чиқаради
Афғонистоннинг сайланган президенти Ашраф Ғани 9 март куни қасамёд қилган ва фаолиятга киришган. Сайловларда мағлуб бўлганини тан олмаган Абдулла Абдулла ҳам шу куннинг ўзида параллел равишда президент сифатида инаугурация маросимини ўтказган. Икки кун ўтгач, Ашраф Ғани томонидан мамлакат ҳукуматидаги бош вазир лавозими бекор қилинган.
