90 ёшли япониялик аёл дунёдаги энг кекса геймер сифатида Гиннес рекордлар китобига киритилди

90 ёшли япониялик аёл Хамако Мори дунёдаги энг кекса геймер сифатида Гиннес рекордлар китобига киритилди, деб ёзади Esquire.

Хамако Gamer Grandma тахаллуси остида YouTube каналини юритади ҳамда у ерга турли ўйинларни ўйнаётгани акс этган видеоларни жойлайди.

Аёлнинг яхши кўрган ўйинлари: Resident Evil 3, GTA 5, Call of Duty: Modern Warfare, Skyrim. Унинг каналини 186 минг киши кузатади.

«GTA 5 ўйнаётганингда тўхтай олмайсан, худди фильм томоша қилаётгандек», — дейди Мори. Унга ушбу ўйиннинг сюжети ва графикаси жуда ёқади, аёл уни зўр ўйин, деб ҳисоблайди. «Мен бир кунда 7-8 соатлаб ўйнайман. Аввал бундан ҳам кўпроқ ўйнардим», — дейди рекордчи аёл.

Аёл ўз коллекциясида «Денди»даги Super Mario’дан тортиб, замонавий ўйинларгача бўлган турли даврларнинг ўйинлари борлигини айтади. Мори 38 йилдан бери ўйин ўйнайди.

«Ўйин ўйнаб ўрганганимдан хурсандман. Мен ҳақиқатан ҳам ҳаётдан баҳра олиб яшамоқдаман», — дейди Мори.