Ижтимоий тармоқларда Сардобадаги сув тўғонининг ёрилиши натижасида жабрланган Сирдарё аҳолисига ёрдам бериш мақсадида ўзи йиғиб юрган пулларни хайрия қилган 3,5 ёшли болакай тўғрисидаги маълумотлар тарқалди. Тошкент шаҳар ҳокимлиги бу болакайнинг кимлигини аниқлаб, у ҳақида репортаж тайёрлади.
Тошкент шаҳрида истиқомат қилувчи 3,5 ёшли Муҳаммад Алимов қатиқ идиши ичига йиғиб келган пулларини хайрияга топширган.
«Фарзандимизнинг турли майда ва қайтим пулларни йиғадиган хайрия қутиси бор эди. Шу кунларда Сирдарёда бўлган воқеалар, талафотларга оиламиз номидан эҳсон қиламиз деб турганимизда шу фикр туғилиб қолди. Кичкина фарзандимиз шу нарсани ҳам [йиғилган пуллар — таҳр.] берайлик деб айтиб қолди», — дейди Муҳаммад Алимовнинг дадаси.
Таъкидланишича, Муҳаммад оиланинг бешинчи фарзанди. Мухбирлар кичик қаҳрамонни қанчалик суҳбатга тортишга ҳаракат қилмасин, болакайнинг уятчанлиги сабаб уринишлар зое кетган.
«Муҳаммад билан йиғаётган пулимиз бор эди. Ўшани битта жойга олиб бориб топширдик. Сув тошқини бўлганига хайрия қилдик», — дейди Муҳаммаднинг акаси Абдулвосит.
Таъкидлаш керакки, Ўзбекистон Президенти ташаббуси билан ташкил этилган «Саховат ва кўмак» умумхалқ ҳаракати доирасида Сардобадаги фалокатдан жабр кўрганларга ёрдам бериш учун «Саховат карвон»лари жўнатилмоқда. Хусусан, Тошкент, Андижон, Самарқанд, Фарғона, Қашқадарё вилоятларидан тошқиндан жабрланган сардобаликлар учун инсонпарварлик ёрдами юборилди.
Мавзуга доир:
Изоҳ (0)