Ғузор туманидаги намунали уйларда аҳоли эътирозига сабаб бўлган камчиликларни бартараф этиш ишлари бошланди. Электр токи эса бошқа тармоқдан улаб бериладиган бўлди. Бу ҳақда «Дарё»га туман ҳокимлиги ахборот хизмати раҳбари Худойберди Йўлдошев маълум қилди.
«Дарё»да эълон қилинган мақолада туманнинг «Амир Темур» маҳалласида яшовчи аҳоли 2018 йил фойдаланишга топширилган намунали уйлар яроқсизлиги ва электр таъминотидаги муаммолардан шикоят қилганди.
«Ушбу ҳолатга ойдинлик киритиш ва камчиликларни бартараф қилиш мақсадида туман ҳокимлигида тезкор ишчи гуруҳ ташкил қилинди, — дейилади туман ҳокимлиги муносабатида. — Ўрганиш натижасида тумандаги ‘Амир Темур’ маҳалласида бунёд этилган намунали уй-жойлар мақолада кўрсатилган даражада ачинарли ҳолда эмаслиги аниқланди»
Туман ҳокимлиги ахборот хизматининг ёзишича, айни кунда бош пудратчи «Намуна Сабрина махсус сервис» хусусий корхонаси томонидан уй-жойлардаги мавжуд камчиликларни бартараф этиш ишлари бошланган.
«Дарё» мухбири билан суҳбатлашган аҳоли вакилларидан бири Лобар Турсунованинг айтишича, ҳақиқатан ҳам қурувчилар улар яшаётган уйларга бориб, аҳоли уйларидаги камчиликларни бартараф этишга киришган.
«Қозонхонадаги камчиликлар тузатилди. Сув қувуридаги носозликлар бартараф этилди. Фақат ҳовлидаги бетон ёмғирдан сўнг қайта таъмирланадиган бўлди», — дейди Лобар Турсунова.
Қўшимча қилинишича, аҳолининг электр энергияси билан боғлиқ муаммоларини бартараф этиш мақсадида маҳалланинг Эл ҳақи кўчасида яшовчи аҳолига «Ғармистон» 110/10 подстанцияси «Янгиер» фидеридан электр токи етказиб берилади.
Изоҳ (0)