«Менинг фикрим» жамоавий мурожаатлар порталида автобус ва йўналишли таксилар учун йўлнинг алоҳида бўлаги ажратиш ҳақида петиция жойлаштирилди.
Унда Тошкент шаҳрида тирбандликлар кўп бўлишини ҳисобга олиб, жамоат транспортидан фойдаланаётган фуқароларга қулайлик яратиш мақсадида жамоат транспортлари, хусусан, автобуслар ва йўналишли таксилар учун йўлнинг алоҳида маълум бир бўлагини ажратиш таклиф қилинган.
Шунингдек, тиғиз вақтда (часпик) ушбу йўлакда ҳаракатланаётган енгил автомобилларга автобус учун йўл бериш мажбуриятини юклаш, буни ДЙҲХХ ходимлари ёрдамида тартибга солиш лозимлиги айтилган.
«Юқоридагиларни инобатга олган ҳолда жамоат транспорт воситалари ҳаракати учун йўлнинг алоҳида йўлагини ажратишни таклиф қиламиз», — дейди петиция муаллифи.
Эслатиб ўтамиз, Тошкент шаҳридаги Фарғона йўли кўчасини реконструкция қилиш доирасида эски трамвай линияси ўрнида тезюрар автобуслар (bus rapid transit) қатновини жорий этиш режалаштирилган. Тажриба сифатида Истиқлол ва Фарғона йўли кўчаси бўйлаб Амир Темур хиёбонидан Compass савдо-кўнгилочар марказига қадар йўналиш белгиланган.
Вазирлар Маҳкамасининг Тошкент шаҳар йўловчи транспорти тизимини такомиллаштириш чора-тадбирлари тўғрисида»ги қарорига кўра, 2020 йил 1 ноябргача ушбу йўналиш бўйлаб махсус қатнов йўлагини яратиш ва 20 та замонавий электробус харид қилиб, қувватлаш ускуналари билан таъминлаш лозим. Агар тажриба лойиҳаси муваффақиятли ўтса, метробуслар шаҳарнинг бошқа йўлларида ҳам ташкил этилади.
Изоҳ (0)