Ўзбекистон бош вазири Абдулла Арипов ва Қозоғистон бош вазири Асқар Мамин 10 май куни Туркистон вилоятининг Мақтаарал тумани Мирзакент посёлкасида учрашди. Бу ҳақда Қозоғистон Бош вазири сайтида хабар берилди.

Фото: Қозоғистон бош вазири матбуот хизмати

Ҳукумат раҳбарлари Мақтаарал туманининг сув тошқинидан зарар кўрган Нурлийўл, Оргебас, Фирдавсий қишлоқларида бўлди ва тошқин оқибатларини бартараф қилиш ишлари билан танишди.

Фото: Қозоғистон бош вазири матбуот хизмати

Ҳозирда сув тошқини оқибатларини бартараф этиш учун 1300 дан ортиқ киши ва 220 та техника жалб қилинган. Жумладан, Ўзбекистондан 200 нафар мутахассис ва 100 га яқин ўт ўчириш машинаси, экскаватор, трактор, сув ҳайдаш насоси ва бошқа техникалар юборилган.

Бош вазирлар Мақтаарал тумани маъмурий маркази — Мирзакент посёлкасида микрорайон қурилиши режаси билан танишиб, маҳаллий фуқаролар билан учрашган ва биринчи уйлар қурилиши учун пойдевор қўйишда иштирок этди.

Фото: Қозоғистон бош вазири матбуот хизмати

Қайд этилишича, умумий ҳисобда Мирзакентнинг Женис, Жаннаттурмуш ва Дўстлик аҳоли яшаш пунктларидаги 500 оила учун уй, мактаб, болалар боғчаси ва фельдшерлик пункти қуриш режалаштирилган. Қурилиш ишлари Ўзбекистон ва Қозоғистон мутахассислари ҳамкорлигида амалга оширилади.

Асқар Мамин ва Абдулла Арипов Фирдавсий қишлоғида тошқиндан зарар кўрган уйларни тиклаш ишлари билан танишиб, маҳаллий аҳоли билан учрашув ўтказган.

Эслатиб ўтамиз, Сардоба сув омборидаги сув тошқини оқибатида Қозоғистоннинг Туркистон вилояти Мақтаарал тумани ҳудудида техноген хусусиятга эга фавқулодда ҳолат эълон қилинганди. Сўнгги маълумотларга кўра, тошқин натижасида вилоят ҳудудида 30 мингдан ортиқ одам эвакуация қилинган. Қозоғистон президени Қосим-Жўмарт Тўқаев тошқиндан жабр кўрган Мақтаарал тумани аҳолиси янги ёки таъмирланган уй жой билан тўлиқ таъминланиши, уларнинг ҳар бирига республика бюджетидан 100 минг тенге берилишини маълум қилганди.