Сирдарё вилоятидаги Сардоба сув омборида фалокат юз берган вақтда аҳолини эвакуация қилиш ишлари вақтида Миллий гвардиянинг уч ходими оқиб кетган. Бу ҳақда Миллий гвардиянинг Тарбиявий ва мафкуравий ишлар бўлими бошлиғи Тўлқин Қодиров 8 май, жума куни АОКАда бўлиб ўтган брифингда маълум қилди.
Аҳолини эвакуация қилиш тадбирлари вақтида Сирдарё вилоятида жойлашган ҳарбий қисм махсус вазифаларни бажарувчи отряд гуруҳ командири, капитан Санжар Ибрагимов, махсус вазифаларни бажарувчи отряд гуруҳ мутахассиси, оддий аскар Ҳазрат Суюнов, жанговар отряд муҳандис-сапёр гуруҳи мутахассиси, учинчи даражали сержант Ҳусниддин Суяров сув тошқинида оқиб кетган.
«Қидирув натижасига кўра, капитан Ибрагимов ҳодиса жойидан 15 километр узоқликдаги масофада соғ ҳолда топилган. Учинчи даражали сержант Суяровнинг жасади 3 май куни соат 8:00 ларда Сирдарё вилояти Оқолтин туманидаги Аҳиллик қишлоғи ‘Кичик Бобур’ маҳалласидан топилган. Минг афсуски, оддий аскар Суюновни қидириш бўйича ишлар ҳали ўз натижасини бергани йўқ», — деди Қодиров.
Аввалроқ Президент Шавкат Мирзиёев Сардоба фалокати оқибатида тўрт киши ҳалок бўлгани, бир киши бедарак йўқолганини маълум қилган эди.
