Жаҳон соғлиқни сақлаш ташкилотининг Тожикистондаги вакили Галина Перфильеванинг маълум қилишича, унинг шартномаси яқин вақт ичида тугайди. Бу ҳақда «Коммерсантъ» хабар берди.
ЖССТ вакилининг маълум қилишича, у мазкур лавозимда вақтинча ишлаб турган. У ташкилотда аллақачон нафақага чиққан, шунинг учун унинг шартномаси муддати тугамоқда. Айни пайтда ташкилот раҳбарияти унинг ўрнини эгалловчи вакилни изламоқда.
Қайд этилишича, пандемия бошланганидан буён Галина Перфильева Тожикистонда коронавирусга чалиниш ҳолатлари йўқлиги ҳақидаги маълумотларни шубҳа остига олмагани учун кескин танқидларга учраган. Натижада Тожикистонда коронавирус билан боғлиқ дастлабки ҳолатлар ЖССТнинг Европа офиси миссиясининг мамлакатга келиш вақти билан бир пайтда аниқланди. Мазкур миссия айни пайтда Тожикистонда бўлиб турибди.
Коронавирус билан боғлиқ вазият фонида 5 май куни Тожикистон соғлиқни сақлаш вазири Насим Олимзод ўз лавозимидан озод этилган.
Тожикистонда 7 май ҳолатига кўра, 461 киши коронавирусга чалинган, 12 нафар бемор касаллик оқибатида вафот этган.
Изоҳ (0)