Қишлоқ хўжалиги соҳасидаги ҳамкорликни ривожлантириш бўйича Ўзбекистон—Чехия ишчи гуруҳи тузилади. Гуруҳнинг вазифаси ушбу соҳада ўзаро савдо ҳажмини оширишдан иборат бўлади. Бу ҳақда 5 май, сешанба куни Ўзбекистон бош вазири ўринбосари, инвестициялар ва ташқи савдо вазири Сардор Умрзоқов ва Чехия бош вазири ўринбосари, саноат ва савдо вазири, транспорт вазири Карел Гавличек ўртасида видеоконференсалоқа шаклида бўлиб ўтган учрашувда келишувга эришилган.
Муҳокамалар чоғида томонлар ўзаро ҳамкорлик кўламини кенгайтиришнинг устувор соҳалари сифатида қишлоқ хўжалиги, тиббиёт ва тиббий асбоб-ускуналар ишлаб чиқариш, автомобилсозлик, металлургия, қишлоқ хўжалиги техникалари, қурилиш материаллари ишлаб чиқариш, тўқимачилик тармоқлари, хусусан, нано-тўқимачилик, нотўқима материаллар ва техник тўқимачилик соҳаларини алоҳида таъкидлаб ўтди. Бу соҳаларда икки мамлакатнинг тегишли идоралари биргаликда истиқболли инвестиция лойиҳаларини ишлаб чиқиб, салоҳиятли шериклар билан ҳамкорликни амалга оширади.
Томонлар 2020 йилнинг иккинчи ярмида иқтисодий, саноат ва илмий-техникавий ҳамкорлик бўйича Ўзбекистон—Чехия ҳукуматлараро комиссиясининг 9-йиғилишига тайёргарлик кўриш бўйича жадал иш олиб боришга ва унинг доирасида икки давлат ишбилармон доиралари иштирокида бизнес-форум ўтказишга келишиб олди.
Шунингдек, Ўзбекистон Инвестициялар ва ташқи савдо вазирлиги билан Чехия Саноат ва савдо вазирлиги ўртасида икки томонлама иқтисодий муносабатларни чуқурлаштириш тўғрисидаги меморандумни ҳамда Ўзбекистон Бандлик ва меҳнат муносабатлари вазирлиги билан Чехия Меҳнат ва ижтимоий ишлар вазирлиги ўртасида ҳамкорлик тўғрисидаги битимни тайёрлаш ва имзолашни тезлаштиришга ҳам келишиб олинди.
«Чехия Экспорт банки», Чехиянинг «Юни Кредит Банк» филиали ва EGAP (Экспорт кафолат-суғурта жамияти) каби ташкилотлар билан ўзаро алоқаларни ўрнатиш, лойиҳалар учун имтиёзли молиялаштиришни жалб қилиш ҳамда молия ва суғурта соҳасида Ўзбекистон мутахассисларининг малакасини ошириш ва молия-техникавий соҳадаги ҳамкорликни кенгайтиришга алоҳида эътибор берилади.
Чехия томони Ўзбекистонга Жаҳон савдо ташкилотига киришда, GSP+ Европа Иттифоқининг имтиёзлар тизими бенефициар-мамлакати мақомини олишда ва Европа Иттифоқи билан Кенгайтирилган шериклик ва ҳамкорлик битимини имзолашда ҳар томонлама ёрдам беришга тайёрлигини билдирди.
Учрашув якунида аниқ инвестиция ва савдо битимларини ишлаб чиқиш ва амалга ошириш, икки томонлама ҳамкорликнинг янги истиқболли йўналишларини аниқлаш, шунингдек, савдо-иқтисодий, инвестициявий, молиявий, техника ва гуманитар соҳалардаги барча келишувларнинг амалга оширилишини мониторинг қилиш учун икки мамлакат ташқи иқтисодий идоралари раҳбарлари ўринбосарлари даражасида қўшма ишчи гуруҳини тузишга келишиб олинди.
Изоҳ (0)