Шавкат Мирзиёев раислигида 5 май, сешанба куни карантин шароитини янада енгиллаштириш ва иқтисодий фаолиятни қайта тиклаш чора-тадбирлари юзасидан ўтказилган видеоселектор йиғилишида корхоналар барқарор ишлаб кетиши учун уларни қўллаб-қувватлашга алоҳида эътибор қаратилаётгани қайд этилди.
Хусусан, «Тўқимачилик ва тикув-трикотаж саноатини қўллаб-қувватлашга доир кечиктириб бўлмайдиган чора-тадбирлар тўғрисида»ги Президент қарори қабул қилигани таъкидланди.
Қарорга кўра:
- тўқимачилик корхоналари ва кластерларини янада қўллаб-қувватлаш, маҳсулот рақобатбардошлигини ошириш мақсадида хом ашё нархини 10 фоизгача пасайтириш имкониятини берувчи халқаро биржа нархларига ўтилади;
- 1 апрелга қадар ички бозорда сотилган пахта толаси учун якуний тўлов муддати 90 кундан 150 кунгача узайтирилди;
- тўқимачилик корхоналари экспорт қилган маҳсулот республикадан чиқиб кетиши билан қўшилган қиймат солиғи тўлиқ қайтарилади;
- соҳа учун муҳим бўлган 64 турдаги хом ашё ва материаллар божхона божидан озод қилинди.
«Экспорт фаолиятини янада қўллаб-қувватлаш чора-тадбирлари тўғрисида»ги Президент қарорига мувофиқ, ташиш харажатлари учун субсидия бериладиган маҳсулот турлари ҳозирги 52 тадан 86 тагача кўпайтирилгани, бу рўйхатга 32 турдаги сабзавот ва полиз маҳсулотлари ҳамда ҳўл, музлатилган ва консерваланган мевалар қўшилгани ҳам йиғилишда гапирилган мавзулардан бири бўлди.
Мазкур транспорт харажатини субсидиялаш механизмидан 2 мингдан зиёд экспортёр корхоналар фойдаланиши имконияти яратилмоқда ва бунга бюджетдан 360 миллиард сўм йўналтирилади.
«Бундай чоралардан мақсад — корхоналар фаолиятини тез тиклаш, экспорт ҳажмини барқарор ошириш, янги иш ўринларини ташкил қилиш учун катта имконият яратиш. Шу сабабли барча даражадаги раҳбарлар доимий равишда ҳар бир туман ва маҳаллада янгича ғоя ҳамда ташаббусларни жорий этиб, оддий халқ ёки камбағалнинг ҳаётини яхшилаш, уларни банд қилиш ва даромадини ошириш масалалари билан устувор даражада шуғулланиши керак», — деган Шавкат Мирзиёев.
Изоҳ (0)