Тошкент шаҳри кўчаларига ўрнатилган 2,5 мингга яқин бетон блоклар Сирдарё вилоятидаги Сардоба сув омбори тўғонининг бузилган қисмини қайта тиклаш учун юборилган. Бу ҳақда Тошкент шаҳар ҳокими Жаҳонгир Ортиқхўжаев 2 май куни Сирдарё вилоятига ёрдам карвонини ташкиллаштирган ташаббускор фаоллар билан учрашувида айтиб ўтган.
Ҳокимнинг таъкидлашича, пойтахт кўчаларида Йўл ҳаракати хавфсизлиги бошқармаси томонидан карантин вақтида йўлларни тўсиш учун фойдаланилган 2,4 мингдан ортиқ бетон блоклар 2 майга ўтар кечаси Сирдарё вилоятига ташилган.
«Дамбани тўсиш учун. 120 та катта-катта юк машиналари кечаси билан ташиди», — дея пойтахт ҳокимининг сўзларидан иқтибос келтирмоқда «Kun.uz».
Эслатиб ўтамиз, 1 май куни тонгда Сардоба сув омбори тўғонида бузилиш юз бериб, Сирдарё вилоятининг бир қатор туманларида сув тошқини кузатилди (фалокат оқибатлари Қозоғистоннинг жанубий туманларига ҳам таъсир қилган).
Мутахассисларнинг фикрича, фалокатга 1 майга ўтар кечаси юз берган кучли шамол ва ёмғир сабаб бўлган. Президент Шавкат Мирзиёев воқеа юз берган куниёқ Сирдарёга етиб борган, ҳозирда тўғоннинг бузилган қисми қайта тикланмоқда.
Президент матбуот хизматининг 3 майдаги ахборотидан:
Ҳозирги вақтда тошқин юз берган жойда иккита бригада ташкил этилиб, тўғон ёриғининг чап ва ўнг қирғоқларида жадал иш олиб борилмоқда. Бу жараёнга юзлаб малакали мутахассислар, мингдан ортиқ махсус техникалар жалб этилган.
Катта ҳарсанг тошлар, бетон блоклар ва плиталар, бошқа тегишли қурилиш материаллари келтирилиб, тўғон олдида ярим айлана шаклида тўсиқ девор барпо этилмоқда. Ишчи-муҳандислар, ҳайдовчилар учун барча шароит яратилиб, саъй-ҳаракатлар кечаю кундуз ташкил этилган.
Мавзуга доир: Сардобадан ҳикоялар
Изоҳ (0)