Жисмоний тарбия ва спорт вазирлиги ва тизимдаги барча ташкилотлар раҳбар, ходимларини Сардоба сув омборидаги авария натижасида жабр кўрган аҳолига ёрдам бериш мақсадида махсус акция бошлади.
Вазирлик томонидан тўпланган буюмлар, озиқ-овқат маҳсулотлари, кийим-кечак, гигиеник воситалар, кир ювиш машиналари, спорт кийимлари ва жиҳозларидан иборат «Саховат карвони» 2 май куни Сирдарё вилоятига етказиб берилган.
Жисмоний тарбия ва спорт вазирлиги томонидан юборилган ҳомийлик кўмаги Гулистон олимпия захиралари мактаб-интернати ҳамда Сирдарё вилояти болалар-ўсмирлар футбол академияси (Футбол маҳорати мактаби) ётоқхоналарига вақтинчалик эвакуация қилинган аҳолига етказиб берилган.
Шунингдек, бу ерга жойлаштирилган фожиадан жабр чеккан аҳолининг бўш вақтини мазмунли ташкил этиш ҳамда уларни руҳий қўллаб-қувватлаш мақсадида стол тенниси, шахмат-шашка спорт турлари бўйича бир қатор мусобақалар ҳам ташкил этилмоқда.
3 май куни ҳам Жисмоний тарбия ва спорт вазирлигининг «Саховат» акцияси доирасида Тошкент шаҳрида йиғилган рўзғор буюмлари, иссиқ кийим-кечаклар, озиқ-овқат маҳсулотлари, мактаб ўқувчилари учун бадиий китоблар, ўқув қуроллари ва бошқа турдаги маҳсулотлардан ташкил топган иккинчи «Саховат карвони» Сирдарё вилоятига жўнатилган.
Изоҳ (0)