Тошкент шаҳар ҳокимлиги ва ИИББ Сирдарё вилоятидаги Сардоба сув омборида рўй берган тўғон ёрилиши натижасида талофат кўрганлар учун марказлашган инсонпарварлик ёрдамини тўплаш марказини ташкил қилди, дея хабар бермоқда ҳокимлик матбуот хизмати. Марказ телефон рақами — (+998) 71 239-17-28.

Кўнгиллилар ҳар куни кийим-кечак, буюмлар, озиқ-овқат маҳсулотларини «Наврўз» ресторани ёнидаги автотураргоҳга (мўлжал — «Халқлар дўстлиги» саройи) қуйидаги тартибда келтириши мумкин:

  • соат 7:00 дан 10:00 гача ва 17:00 дан 20:00 гача истаги бор барча фуқаролар ўз автомобилларида;
  • соат 10:00 дан 20:00 гача — махсус стикерларга эга автомобилларда.

Бу ерда аҳоли томонидан етказилган ёрдам юклари махсус ажратилган автобусларда (юк машиналарида), барча санитария-эпидемиология меъёрларига риоя қилган ҳолда, Сирдарё вилоятига жўнатилади.

«Сиздан илтимос, тушунмовчиликлар, фирибгарлик ҳолатлари рўй бермаслиги учун пул маблағларини йиғиб ҳисоб рақамлари ёки банк карталарига жўнатманг», — дейилади ҳокимлик ахборотида.

Қайд этишларича, талофат кўрган Сирдарё вилоят аҳолисига ёрдам кўрсатиш бўйича алоҳида ҳисоб рақами очилиши кутилмоқда, бу ҳақда қўшимча тарзда эълон қилинади.

Сирдарё вилоятида 1 май куни тонгда Сардоба сув омбори тўғони пикетларидан бирининг ёрилиб кетиши оқибатида сув тошқини юз берган; 2 май тонги ҳолатига кўра 70 мингга яқин аҳоли хавфсиз ҳудудга кўчирилган, камида 56 киши турли тан жароҳатлари билан касалхоналарга ётқизилган.

Президент Шавкат Мирзиёев айни вақтда Сирдарё вилоятида бўлиб турибди; давлат раҳбари «шароит яхшиланмагунича бирорта раҳбар ҳеч қаерга кетмаслиги»ни таъкидлаган.