Путиннинг собиқ ёрдамчиси, Дерипасканинг лоббисти, давлатнинг иқтисодиётга аралашуви тарафдори. Россия муваққат бош вазири этиб тайинланган Андрей Белоусов ҳақида

Путиннинг ёрдамчиси, ҳукуматнинг иқтисодиётга аралашуви тарафдори ва келажакда ҳозирги бош вазирни алмаштириш эҳтимоли мавжуд бўлган номзод. Tjournal Мишустин ўрнига Россия бош вазири вазифасини бажарувчи этиб тайинланган Андрей Белоусов ҳақидаги асосий маълумотларни тақдим қилди.

30 апрель куни Россия ҳукумати раҳбари Михаил Мишустин ўзида коронавирус инфекцияси аниқланганини эълон қилди. У бемор вақтида бош вазир вазифасини бажариш биринчи ўринбосари Андрей Белоусов зиммасига юкланди.

Белоусов давлат хизматига 2006 йилда келган ва ўшанда Россия Федерацияси иқтисодий ривожланиш вазирининг ўринбосари лавозимига тайинланганди, у вақтда вазирликка Герман Греф раҳбарлик қилган;

Вазир ўринбосари лавозимини эгаллагунига қадар Белоусов Макроиқтисодиёт таҳлили ва прогнозлари марказини ташкил қилган, Давлат думасининг иккита қўмитасида эксперт, бош вазирларнинг штатдан ташқари маслаҳатчиси бўлган ва ҳукумат ҳамда Давлат кенгашининг дастурий ҳужжатларини ишлаб чиқишда иштирок этган.

2012 -2013 йилларда Белоусов иқтисодий ривожланиш вазири лавозимида ишлади, 2020 йилгача эса Путиннинг иқтисодий масалалар бўйича ёрдамчиси сифатида фаолият олиб борган. У иқтисодиётда миллий мақсадларни белгилаб берган май ойида эълон қилинган фармон муаллифларидан бири. Белоусов иқтисодиётнинг давлат ихтиёрида бўлиши тарафдори, яъни унга ҳукумат ва давлат раҳбарияти аралашиши лозим деб ҳисоблайди.

2018 йилда металлургия ва кимё заводларининг эгалари Белоусов устидан шикоят қилиб, ҳукуматга арзнома киритган. Амалдор уларга даромадларидан давлатга улуш беришни таклиф қилган. Ушбу маблағ, яъни 514 миллиард рублни май ойидаги фармон ижроси учун сарфланиши кўзланганди. Якунда ихтиёрий равишда давлатга пул топшириш ҳақида қонун лойиҳаси қабул қилинди.

2020 йил январида Белоусов бош вазирнинг биринчи ўринбосари лавозимига тайинланди.

«Белоусовнинг бош вазир ўринбосарлигига тайинланиши нисбатан тушунарли вазият, бу иқтисодий ўсишга қандай таъсир қилади: улар пуллар чоп этишади», – дея Белоусовнинг ҳукумат раҳбариятидаги лавозимлардан бирини эгаллашига муносабат билдирган «Новая газета»да нашр қилинадиган мақолалар муаллифи, политолог Дмитрий Орешкин.

Forbes берган маълумотларга кўра, Белоусов бош вазирнинг биринчи ўринбосари сифатида Путин эътибор қаратаётган миллий лойиҳалар ижросини назорат қилади.

«Янги бош вазир ўринбосарининг тайинланиши инқирозга қарши чораларнинг бўлиниши ва ўсишни англатади. Содда қилиб айтганда, Силуанов — молиячи ва бухгалтер, Белоусов эса иқтисодий ривожланишнинг макроиқтисодий масалалари билан шуғулланади», — дея нашрга маълумот берган федерал амалдорлардан бири.

Белоусовни миллиардер Олег Дерипаска манфаатларига хизмат қилувчи лоббист деб ҳисоблашади. «Собеседник» нашри 2000 йиллар бошида унинг олигарх қўлида ишлаганини аниқлаган. Дерипасканинг компаниялари эса давлат билан даромадини бўлишиши зарур бўлган иқтисодиёт иштирокчилари рўйхатига кирмаган.

Meduza манбаларидан бири Мишустиннинг бош вазир курсисига қайтмаслигини тахмин қилмоқда. Ҳукуматдаги суҳбатдош амалдаги бош вазир қайтгандан кейин бошқа лавозимга ўтишини билдирган. «Ҳозир вазият ўзгарган, иқтисодиёт пандемия сабаб ўтириб қолди, энди уни ишга тушириш зарур. Мишустин буни эплай олмаса керак», — деган нашрга берган хабарида.