27 апрель, душанба куни, соат 21:15 дан 23:05 га қадар эсган кучли шамол Қашқадарё вилоятида ҳам кўплаб талафотларни келтириб чиқарган. Бу ҳақда вилоят ҳокимлиги ахборот хизмати маълум қилмоқда.
Таъкидланишича, кучли шамол натижасида вилоятда учта кўп қаватли уйнинг 1020 метр квадрат том ёпмаси, 52 та якка тартибдаги турар жой биносининг том қисмлари, иккита ташкилот биносининг 200 метр квадрат том ёпмаси, иккита ички газ қувури, бешта иссиқхона ҳамда 97 та турли хил катталикдаги дарахт зарарланган.
Шунингдек, дарахтлар ва биноларнинг том қисми қулаши натижасида электр энергияси ва табиий газ таъминотида фавқулодда ўчишлар юзага келган.
Ҳозирда вилоят Фавқулодда вазиятлар бошқармаси ҳамда вилоят Фавқулодда вазиятлар давлат тизими хизматининг тегишли куч ва воситалари жалб этилган ҳолда кучли шамол оқибатлари бартараф этилмоқда.
Тадбирга вилоят Фавқулодда вазиятлар бошқармаси ва ҳудудий тузилмалари томонидан 16 та техника ва 75 нафар шахсий таркиб жалб этилган.
Эслатиб ўтамиз, 27 апрель куни республика ҳудудига кириб келган кучли шамол Бухоро, Навоий, Самарқанд ва Қашқадарё вилоятларида аҳоли ҳаёти, инфратузилма тармоқлари ва қишлоқ хўжалиги экинларига катта зарар етказди.
Президент Шавкат Мирзиёев айни пайтда Бухорода бўлиб, вилоятидаги ҳолатни кўздан кечирмоқда.
Мавзуга доир:
- Шамолдан зарар кўрган Қоракўл ва Олот — Президент вертолётидан олинган суратларда
- «Талафот оқибатлари тезда бартараф этилади». Мирзиёев табиий офатдан зарар кўрган аҳолига ҳар томонлама кўмаклашиш бўйича топшириқ берди
- Шавкат Мирзиёев — Бухорога ёпирилган шамол ҳақида: Бундай табиий офат илгари кузатилмаган
Изоҳ (0)