Бухоро, Навоий ва Қашқадарё вилоятлари ҳудудида 27 апрель куни кечқурун кузатилган кучли шамол ва ёғингарчилик «Ўзбекнефтгаз» компанияси тизимидаги ишлаб чиқариш корхоналари фаолиятига ҳам салбий таъсир кўрсатди. Бу ҳақда компания томонидан маълум қилинди.
Хабар берилишича, 27 апрель куни соат 20:20 да кучли шамол оқими келиши натижасида Қашқадарё вилоятида жойлашган «Муборак нефть ва газ қазиб чиқариш бошқармаси»га қарашли «Алан» конининг сиқув компрессор станциясидаги иккита газ ҳайдаш агрегати ва «Кўкдумалоқ» конининг 2-йиғиш жойидаги битта газ ҳайдаш агрегати авария ҳолатида тўхтаб қолган.
Шу куни соат 21:55 да «Кўкдумалоқ» конининг 2-йиғиш жойидаги газ ҳайдаш агрегати, соат 22:00 да эса «Алан» конининг сиқув компрессор станциясидаги тўхтаб қолган иккита газ ҳайдаш агрегатининг бири ишга туширилди. 28 апрель куни соат 01:45 да эса «Алан» конидаги тўхтаб қолган иккинчи газ ҳайдаш агрегатининг фаолияти ҳам қайта тикланди.
Бухоро вилоятида жойлашган «Газли нефть ва газ қазиб чиқариш бошқармаси»га қарашли «Учқир» газни олтингугуртдан тозалаш қурилмасининг бешта технологик тармоғи ва «Учқир» қурилмасига юқори босимли буғ етказиб берувчи қозонхонадаги бешта қозон 27 апрель куни соат 20:35 да авария ҳолатида тўхтаб қолган.
Маълум қилинишича, ҳозирга қадар электр таъминотидаги узилишлар сабабли «Газли нефть ва газ қазиб чиқариш бошқармаси»га қарашли қурилмалар фаолияти тиклангани йўқ.
Шунингдек, 27 апрель соат 21:37 да «Шўртан нефть ва газ қазиб чиқариш бошқармаси»га қарашли станцияларда саккизта газ ҳайдаш агрегати ишлашдан тўхтаган. 28 апрель куни соат 03:50 га қадар «Шўртан нефть ва газ қазиб чиқариш бошқармаси»га қарашли барча технологик қурилмаларнинг иш фаолияти қайта тикланган ва улар бир маромда ишламоқда.
Таъкидланишича, «Ўзбекистон миллий электр тармоқлари» компанияси тасарруфидаги филиал ҳамда юқори кучланишли подстанцияларда хизмат вазифасини олиб борувчи мутахассислар билан ҳамкорликда электр таъминотини тиклаш ҳамда кучли шамол оқибатида етказилган зарар оқибатларини бартараф этиш ишлари олиб борилмоқда.
Эслатиб ўтамиз, Бухорода юз берган кучли шамол оқибатида бир киши ҳалок бўлди, 41 киши жароҳатланди. Кучли шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолди. Бухоро кучли шамолдан сўнг электр таъминотида энг катта талафот кўрган ҳудуд бўлиб турибди. Бош прокуратура Бухородаги кучли шамол оқибатлари бўйича терговга қадар текширув ўтказмоқда.
Ўзбекистон Президенти Шавкат Мирзиёев Бухорода юз берган кучли шамол оқибатларини кўздан кечириш учун вилоятга ташриф буюрди ҳамда Олот ва Қоракўлда табиий офат оқибатларини кўздан кечирди.
Маълум бўлишича, 27 апрель шамолидан сўнг Қоракўл ва Олот туманлари билан алоқа узилиб қолган. Интернетда трактор тиркамасида Бухоро шаҳри томон кетаётган қоракўлликлар видеоси пайдо бўлди. Фавқулодда вазиятлар вазирлиги мазкур видеога изоҳ берди. Унга кўра, Қоракўл ва Олотда тошқин ҳақида асоссиз миш-миш тарқалган.
Бундан ташқари, Бухорода кучли шамолдан сўнг 415 та автомобилга жиддий зарар етгани маълум қилинди.
Изоҳ (0)