Дания футбол иттифоқи (DBU) президенти Йеспер Мёллер Копенгаген шаҳри келаси йили Евро—2020 мусобақасини ўтказа олишига шубҳа билан қарамоқда. 2021 йилнинг июль ойида Данияда «Тур де Франс» велопойгалари бўлиб ўтади.
«Мени ҳали ҳам бир савол ўйлантирмоқда, биз Копенгагенда ўйинларни ўтказа олармиканмиз? Ўйлашимча, имкониятлар 50 га 50. Барча бу борада позитив кайфиятда ва олға интилишда давом этмоқчи. Бироқ Копенгагендаги ўйинларни ўтказа олишга тўлиқ ишонч ҳосил қилиш учун, баъзи муаммоларни бартараф этиш керак», — дейди Мёллер.
УЕФА қарорига кўра коронавирус пандемияси сабаб 2021 йилнинг ёзига қолдирилган мусобақа «Евро—2020» номини сақлаб қолади. 12 та мезбон шаҳар 30 апрелга қадар УЕФАга мусобақани ўтказа олиши борасида кафолат тақдим этиши керак. Копенгаген В гуруҳининг учта учрашуви ва 1/8 финалнинг битта ўйинига мезбон ҳисобланади.
Эслатиб ўтамиз, Европа Чемпионати 2020 йилда минтақанинг 12 шаҳрида 12 июндан 12 июлга қадар ўтказилиши керак эди. Март ойи ўрталарида мусобақа 2021 йилга қолдирилгани маълум қилинганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)