Бир вақтлар футболчилар ҳозиргидек итоаткор ва бўйсунувчи бўлмаган. Ўша пайтларда нисбатан қаҳри қаттиқроқ, қўпол ва харизматик ўйинчилар майдонда кўпчиликни ташкил этарди. Рой Кин ва Винни Жонс каби тажовузкор ўйинчилар даври ортда қолди. Бироқ футболда ҳам барча соҳаларда бўлгани каби истиснолар ҳам учраб турибди.
Transfermarkt статистикаларидан фойдаланган ҳолда, фаолияти давомида энг кўп қизил карточка олган ўйинчиларнинг рамзий терма жамоаси тузилди. Рамзий жамоа вакилларининг умумий ҳисобдаги қизил карточкалар сони 168 тани ташкил қилди. Қуйида улар билан танишиш мумкин.
Дарвозабон
Йенс Леманн – 7 та қизил
«Арсенал»нинг собиқ дарвозабони Леманн баъзан ўзининг қўпол ҳаракатлари билан ажралиб турарди. Леманн Дортмунднинг «Боруссия»сида ўйнаган даврларидаёқ «ёмон бола» сифатида шуҳрат қозонган. У қизил карточкалар сони бўйича дарвозабонлар орасида Бундеслига рекордчиси ҳисобланади.
Ҳимоячилар
Серхио Рамос – 26 та қизил
Рамос футболда ҳамон қўпол ўйинчилар борлигига исбот бўла олади. Очиғини айтганда, унинг бу рўйхатга киритилиши ҳеч кимни ажаблантирмаса керак. Кўпчилик Рамос нафақага чиққунига қадар қизил рангдаги карточкалари сонини 30 тага етказиб олишига ишонмоқда. У 187 та огоҳлантириш билан Ла Лига рекордчиси ҳисобланади. Шунингдек, Рамос Чемпионлар Лигасида ҳам 40 та огоҳлантиришни ўз номига расмийлаштириб қўйган.
Пепе — 12 та қизил
Ажабланарлиси, Пепе атиги 12 мартагина майдондан четлатилган экан. Рақибларни йиқитиш ва ҳакамларни ҳақорат қилишнинг ишқибози бўлган португалиялик футболчининг ташланишларидан ҳатто унинг жамоадошлари ҳам ҳайиқиб туради.
Марко Матерацци – 15 та қизил
Зидан 2006 йилги Жаҳон Чемпионати финалида айнан Марко Матераццига боши билан зарба бергани учун майдондан четлатилганди. Аммо Матераццининг ўзи ҳам «подкат»лари ва тирсак зарбалари билан Зидандан қолишмаган. Уни ҳатто антифутболчи деб ҳам аташарди, бироқ унга буларнинг умуман қизиғи бўлмаган.
Патрис Эвра — 12 та қизил
Хушчақчақлиги ва ижтимоий тармоқлардаги ҳазиллари билан танилган Патрис Эвра бир вақтлар майдондаги қўпол ҳаракатлари билан ҳам анча машҳур бўлган. У умумий ҳисобда 12 та қизилга муносиб кўрилган. Аммо бундан ҳайратланишнинг ҳожати йўқ, чунки гап ўз мухлисларидан бирининг бошига туширган одам ҳақида кетмоқда. У ҳатто Европа Лигасида ўйин бошланмасидан аввал қизил карточка олган ягона футболчи сифатида тарихга кирган.
Ярим ҳимоячилар
Даниэле де Росси — 15 та қизил
Де Россининг ўзи ҳакамлар билан яхши чиқишмаслиги ва олган қизиллари ҳаққоний эканини тан олганди. Унинг энг машҳур қўполлиги 2006 йилги мундиалда (Италия сафида) АҚШ терма жамоасига қарши ўйинда рақиб футболчисини тирсаги билан урганидир. Шундан сўнг ФИФА де Россига навбатдаги тўртта ўйинда иштирок этишни тақиқлаб қўйганди.
Эдгар Давидс — 25 та қизил
Луи ван Гал Давидсни «Питбулл» деб чақириши бежиз эмас. Унинг муттасил тажовузкорлиги, қаттиққўллиги ва зўравонлиги бошқалардан ажралиб турарди. 25 та қизил рангли карточка бунинг исботи бўла олади. Ўз вақтида Давидс саккиз ўйинда уч маротаба майдондан четлатилган.
Зинедин Зидан– 14 та қизил
Зиданнинг сўнгги учрашуви 2006 йилги Жаҳон Чемпионати финали бўлган, ўша ўйинда Матераццига «калла» қўйгани учун майдондан четлатилганди. Зидан дунёнинг энг яхши футболчиларидан бирилигига, юқори техникаси ва зарбаларининг аниқлигига қарамай, тез-тез қўполлик қилиб турарди. Бироқ бу унинг обрўйига заррача таъсир қилмаган.
Франческо Тотти — 16 та қизил
Рўйхатдаги учинчи италиялик футболчи Тотти юқори даражали ўйинчи бўлган ва ҳеч қачон курашлардан қочмаган. У 22 йиллик фаолияти давомида 16 та қизил карточка ишлаб олди. «Рим қироли» ҳам қаҳрамон, ҳам ёвуз эди. Айнан шунинг учун ҳам уни Италия пойтахтида севишган.
Ҳужумчилар
Златан Ибрагимович — 13 та қизил
Златан олдинги чизиқда ҳаракат қилишига қарамай, фаолияти давомида 13 марта майдондан чиқариб юборилган. Златан тили бийронлиги ва рақибга қарата тўғридан-тўғри йўллаган зарбалари учун кўпчиликнинг ғазабига дучор бўлгани ҳеч кимга сир эмас. Златаннинг MLS чемпионатида рақибининг бошига қай тарзда ургани ҳамон кўпчиликнинг ёдида бўлса керак.
Марио Балотелли — 13 та қизил
«Супер Марио» нафақат майдонда, балки унинг ташқарисида ҳам ўзига хос жанжаллари билан мухлислар ёдида қолган. У «Милан», «Интер», «Марсель», «Манчестер Сити» ва «Ницца» клубларида қизил карточкалар олган. Ҳатто унинг «Ливерпуль» билан шартномасида хулқ-атвор тўғрисида банд бўлган. Агар Балотелли бир мавсум давомида учтадан кўп қизил карточка олмаса, унга қўшимча бир миллион фунт тақдим этиларди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)