Италиядаги музейлар ҳамда Колизей ва Помпей каби археологик ёдгорликлар май ойида очилади. Бу ҳақда Италия маданият ва туризм вазири Дарио Франческини La Repubblica нашрига берган интервьюсида маълум қилди.
Вазирнинг айтишича, музей ва ёдгорликлар мамлакатда карантин якунланадиган 4 майдан эмас, балки сал кейинроқ қайта ишга тушади, айни вақтда барча хавфсизлик чораларини таъминлай олган муассасаларгагина ишлашга рухсат берилади.
Чегараларни очиш ҳақида гапиришга эса ҳали эрта, дея таъкидлади вазир. Шу боис Италия расмийлари эътиборни ички туризмга қаратишга қарор қилган. Ҳукумат кам даромадли оилалар мамлакат курортларида ҳордиқ чиқара олиши учун уларга пул ажратмоқчи. Ҳар бир оилага 500 евродан ёки ҳар бир кишига бундан камроқ сумма ажратилиши кутилмоқда.
Италияда 25 апрель ҳолатига кўра, 192 минг кишида коронавирус аниқланган, улардан 25 минг нафари вафот этган, яна 60 минг киши эса касалликдан соғайишга муваффақ бўлган.
Изоҳ (0)