Солиқ кодекси билан 2020 йилдан бошлаб Ўзбекистон ҳудудида жисмоний шахсларга хизматларни электрон шаклда тақдим этадиган хорижий компаниялари учун қўшилган қиймат солиғини (ҚҚС) тўлаш жорий этилди. Бу ҳақда ДСҚ матбуот хизмати хабар берди.
Фото: UFD.by
Мамлакатда бундай компанияларни рўйхатга олиш учун Давлат солиқ қўмитаси томонидан махсус хизмат – Интернет-компанияларнинг ҚҚС-офиси яратилган.
Бугунги кунга қадар ҚҚС-офис орқали Ўзбекистонда 9 та хорижий компаниялар ихтиёрий солиқ тўловчи сифатида рўйхатдан ўтган:
- Google Commerce Limited;
- Google Ireland Limited;
- Google Voice Inc;
- Apple Distribution International Limited;
- Netflix International B.V.;
- Samsung Electronics Cо., Ltd.;
- Sleverbridge AG;
- Xsolla (USA), Inc.;
- Activision Blizzard International BV
ҚҚС бўйича биринчи тўлов Google Commerce Limited компанияси томонидан амалга оширилган. Компания жорий йилнинг I-чораги якунларига кўра давлат бюджетига 85 минг евро миқдорида маблағ тўлаган.
«Ихтиёрий рўйхатдан ўтиш, чет эл корхоналари (компаниялар) ўз имижига путур етказмаслик билан бир қаторда ҳудудида пуллик хизмат кўрсатаётган давлатнинг қонунларини ҳурмат қилишларини билдиради. Ҳозирда Ўзбекистонда ҳам электрон тижорат тезкорлик билан ривожланаётганлигини инобатга олиб, бундай ихтиёрий рўйхатдан ўтиш ва солиқларни тўлаш маҳаллий тадбиркорлар учун ҳам яхши намуна бўлади», — дейилади хабарда.
Аввалроқ Apple Ўзбекистон учун App Store’даги дастурлар нархини оширгани, бунга «Google солиғи» сабаб бўлиши мумкинлиги ҳақида хабар берилганди.
Эслатиб ўтамиз, Ўзбекистон Солиқ кодексининг янгиланган таҳририда «Google солиғи» белгилаб қўйилгани ҳақида хабар берилган. «Яндекс»нинг Ўзбекистондаги минтақавий директори лавозимида бир неча йиллар ишлаган Евгений Лукьянчиков «Google солиғи» икки томонлама солиққа тортилишга олиб келиши мумкинлигини маълум қилганди.
