Шарқнинг гўзал хонимлари нафақат чиройи, кийиниш услуби, балки соч турмаги билан ҳам ҳамиша эътиборга сазовор бўлиб келган. Cosmopolitan нашри тақдим қилган суратлардан қирол ва шайхлар рафиқасининг соч турмаклари қандай эканини билиб олишингиз мумкин.
Рания ал-Абдулла
Иордания қироличаси шарқнинг энг гўзал хонимларидан бири ҳисобланади. Унинг кийиниш борасидаги диди, образнинг мукаммаллигига алоҳида эътибор бериши ҳамиша эътироф этиб келинади. Рания сочини камдан кам ҳолларда мураккаб усулда турмаклайди, асосан, оддий ва сипо турмакларни хуш кўради. Унинг қиёфаси ва турмагидан бу йил 50 ёшга киришига ишониш қийин.
Ҳайя бинт ал-Ҳусайн
Иордания қироличасининг синглиси, БАА бош вазирининг собиқ рафиқаси Ҳайя бинт ал-Ҳусайн қалин ва ўзига хос рангли соч соҳибаси. У ҳам сочини, асосан, тўлқин ёки жингалак қилиб турмаклайди.
Амира ат-Тавил
«Оловуддин» эртагидаги малика Ясминга тенглаштириладиган ушбу гўзал хоним Саудия шаҳзодаси ал-Валид ибн Талалнинг собиқ турмуш ўртоғи бўлган. У турли турмакларни хуш кўради. Узун ва қалин сочлари эса қандай турмакланмасин унинг ҳуснига янада кўрк қўшади.
Дина Абдулазиз ал-Сауд
Саудия шаҳзодасининг рафиқаси, ўзига хос услуби билан ажралиб турувчи шарқ гўзали Дина Абдулазиз ал-Сауд сочи устида тажрибалар ўтказишдан қўрқмайди. Унинг турмаги ва услубида шарқ ва ғарбнинг уйғунлигини кўриш мумкин. Айниқса, калта соч турмаги уни янада замонавий қилиб кўрсатган ва бу турмак ўзига жуда ҳам ярашган.
Лалла Салма
Mallасоч, жозибадор ушбу хонимнинг жингалак сочларига кўпчилик ҳавас билан қарайди. Қироллик оиласи вакили бўлган Лалла тадбирларда камдан кам намоён бўлса-да, унинг табиий турмакни ёқтиришини билиш қийин эмас.
Дана ал-Халифа
Баҳрайн маликасининг гўзаллиги тилларда достон. Ушбу хоним Instagram саҳифасида @theoverdressed блогини юритади. Унинг соч турмагига назар ташланса, ортиқча бачканаликларни ёқтирмаслигини, танлов борасида ёйилган сочни маъқул кўришини билиш мумкин. Кийиниш борасидаги услуби билан эса малика янада замонавий, латофатли кўринади.
Изоҳ (0)