Қоматни кийим-кечак орқали ихчам кўрсатишнинг 7 усули

Қадди-қомат чиройли кўриниши учун спорт билан шуғулланиш, таомномага эътибор қаратиш кераклиги ҳақиқат, лекин кийиниш борасида шундай усуллар борки, уларга амал қилинса, қомат ихчамроқ кўринади. Elize нашри улар нимадан иборатлигига тўхталади.

1. Қоматингизни камчилиги бор қисмларини аксессуар ёрдамида яшириб, устунликларига урғу беринг. Масалан, ёрқин рангли шарф, оёқларни озғин кўрсатадиган шим ва учли туфли кийиш тавсия қилинади. Шунда диққат шарф ва туфлигингизда бўлиб, камчилик бор қисм эътибор тортмайди. Образни тартибли ва бачкана бўлмаган макияж билан якунланг.

2. Миди узунлигидаги юбка ва пошнали туфли қадди-қоматни чиройли кўрсатиш учун энг яхши вариант. Бундай юбка оёқларни узун, белни ихчам кўрсатади. Аслида бундай юбкани крассовка, балеткалар билан ҳам мослаш мумкин, лекин сиз максимал даражада озғинроқ кўринишни истасангиз, пошнали туфли кийиш тавсия қилинади.

3. Кенг камар ёки белбоғ гардеробингиздан, албатта, ўрин олган бўлиши керак. Ушбу деталь билан қоматингиз янада пропорционал кўриниш касб этади. Кенг либос устидан тақилган камар белни ингичкароқ кў​рсатади.

4. Тўқ рангли либослар оч рангли либосларга қараганда озғинроқ кўрсатади. Шундай экан танлов борасида кўк, қора, сиёҳ ранг шим ёки юбка яхши вариант.

5. Олд қисми V шаклида бўлган кофта, блузка ва кўйлаклар бўйинни узунроқ, қадди-қоматни эса жозибали кўрсатади. Шу боис шундай бичимдаги либосларни кийишга ҳаракат қилинг.6. Узун ва кенгроқ турадиган пиджак ва костюмларни танланг. Бундай кийимлар қорин ва бел қисмидаги камчиликларни яширади. Бундай услубдаги пиджаклар билан бел қисми баланд бўлган шим, водолазка, топ ёки блузалар чиройли кўринади. Айниқса, образни водолазка устидан ўзига хос маржон ёки аксессуар билан якунлаш янада дидли кўрсатади.

7. Тўлароқ бўлган аёл ва қизлар либоснинг матосига ҳам эътибор бериши керак бўлади. Ялтироқ бўлмаган матодан тикилган кийимларни кийиш ва уларнинг қалинлиги, бичими, узунлиги қадди-қоматга қанчалик тўғри келишидан келиб чиқиб танлаш тавсия қилинади.